सरकार गठनका लागि सभामुखको सक्रिय सहभागिता संसदीय मान्यता विपरित होः डा. शेखर कोइराला

काठमाडौं — नेपाली कांग्रेसका नेता डा. शेखर कोइरालाले कोशी सरकार गठनका लागि सभामुखको समेत हस्ताक्षर हुनु सिद्धान्त विपरित भएको जनाएका छन् ।

सामाजिक सञ्जालमार्फत् नेता कोइरालाले उनले सभामुखको भूमिका संवैधानिक रहने भएकोले संसदको कार्य सञ्चालन गर्नु, अध्यक्षता गर्नु र संसदमा पेश भएका विषयमा मतदान हुँदा निर्णायक मत जाहेर गर्ने बाहेक कार्यपालिका, गठन, विघटन र समर्थनमा सक्रिय रही हस्ताक्षर गर्नु संसदीय लोकतन्त्रको मर्यादा, अभ्यास र कानुनी शासनको विपरित हुने जनाएका छन् ।

उनले लेखेका छन्,

सन्दर्भ कोशी प्रदेश सरकार गठनः

प्रदेश सरकार गठन वा समर्थनको सवालमा कुन पार्टीको समर्थन रहने भन्ने कुरा सोहि पार्टीको संसदीय दल वा समितिबाट प्रदेश प्रमुखलाइ जानकारी दिन सकिने व्यवस्था छ।

प्रदेश संसद्को सभामुख संलग्न भएको दलको समर्थनमा सरकार निर्माण हुने प्रक्रियामा सो दलले आफ्नो सदस्य संख्यामा सभामुखलाई समेत गणना गरि पठाउने कुराको संबैधानिक ब्याख्या छैन।  तर सभामुख आफैले हस्ताक्षर गरेर सरकार गठनमा समर्थन रहेको कुरा लिखित रुपमा पेस गरेको अवस्था हो भने यस्तो कार्य संबैधानिक सर्वोच्चता र लोकतान्त्रिक संसदीय पद्दतिको सिद्धान्त बिपरित हुन जान्छ।  सभामुखको संबैधानिक भूमिका भनेको व्यवस्थापिका संसदको कार्य संचालन गर्नु र अध्यक्षता गर्नु हो। यदि संसदमा पेस भएका बिषयमा मतदान भएको अवस्थामा मत बराबर भएमा निर्णायक मत जाहेर गर्ने बाहेक कार्यपालिका गठन, बिघटन र समर्थनमा सक्रिय रही हस्ताक्षर गर्नु संसदीय लोकतन्त्रको मर्यादा, अभ्यास र कानूनी शासनको बिपरित हुन जान्छ।