‘प्रधानमन्त्री केपी ओलीले बाटोमा जसलाई देख्यो उसैलाई गाली गर्दै हिँड्न थाले’
कागजपत्र |
काठमाडाैं – नेपाल कम्युनिष्ट पार्टी नेकपा प्रचण्ड–नेपाल पक्षका नेता वर्षमान पुनले प्रधानमन्त्री केपी ओलीले बाटोमा जसलाई देख्यो उसैलाई गाली गर्दै हिँड्न थालेको टिप्पणी गरेका छन् ।
बुटवलमा भएको साक्षात्कार कार्यक्रममा बोल्दै पुनले ओली ‘कुकुर देखे कुकुरलाई र ढुकुर देखे ढुकुरलाई हान्ने’ भन्दै व्यङ्ग्य गरेका छन् । ‘ओलीले अदालतलाई गाली गरेका छन्, वलिकलाई गाली गरेका छन्, मिडियालाई गाली गरेका छन्, डाक्टरलाई गाली गरेका छन्, जसलाई देख्यो उसैलाई गाली गर्दै हिँडेका छन् ।’ पुनले भने ।
ओली सरकार काम चलाउ नै भएपनि प्रधानमन्त्री पदको मर्यादा कायम गर्दै सबैसँग निहुँ खोज्दै नहिँड्न उनले सुझाव दिएका छन् । ‘सवैसँगै निहुँ खोज्दै गाली गर्दै नहिँड्नुहोस् । जिम्मेवार बन्नुहोस् ।’ उनले भने ।
पुनले नेतृत्वमा बसेको मान्छेले सकारात्मक सोच बोकेर राम्रो गरेर देखाउनु पर्ने बताए । पूर्वमन्त्री समेत रहेका पुनले हिजो निर्वाचन आयोगले गरेको निर्णय प्रति कार्यकारीको अगाडि संवैधानिक निकाय लाचार भएको पुष्टि भएको आरोप लगाएका छन् ।
निर्वाचन आयोग आफ्नो जिम्मेवारीबाट पन्छिएको आरोप लगाउँदै उनले आयोगको क्षमताप्रति प्रश्न पनि उठाएका छन् । ‘नेकपाको ४४१ जना केन्द्रीय सदस्यलाई मान्यता दिएको आयोगले ७० प्रतिशत बढीको हस्ताक्षरमा भएको निर्णयलाई वैधानिकता दिनुपर्थ्यो,’ पुनले भने । उनले निर्वाचन आयोगको निर्णयप्रति पार्टीले आधिकारिक धारणा सार्वजनिक गर्ने पनि बताए ।
