भरतपुरमा एमाले–राप्रपाबीच चुनावी तालमेल, रेणु दाहाललाई छैन सजिलो
कागजपत्र |
काठमाडाैँ- चितवनको भरतपुर महानगरपालिकामा प्रमुख प्रतिपक्षी नेकपा एमाले र राजेन्द्र लिङ्देन नेतृत्वको राष्ट्रिय प्रजातन्त्र पार्टी (राप्रपा) बीच चुनावी तालमेल हुने भएको छ। कांग्रेस-माओवादी केन्द्र गठबन्धनलाई पराजित गर्ने योजनासहित यी दुई दलबीच आइतवार दिनभर वार्ता भएको थियो।
राष्ट्रिय प्रजातन्त्र पार्टीका उपाध्यक्ष विक्रम पाण्डेको गृहजिल्ला चितवनको भरतपुरमा कांग्रेसको साथ लिएर माओवादी केन्द्रकी रेनु दाहाल दोहोरिन तयार भएको अवस्थामा विपक्षीको मोर्चाबन्दी बनेको हो।
आइतवार पटक पटक भएका वार्ताले निचोड दिन सकेको थिएन। तर आइतवार राति पनि भएको वार्तापछि तालमेलमा सहमति जुटेको हो। भरतपुरको मेयरमा एमालेले बागमती प्रदेश सांसद विजय सुवेदीलाई मैदानमा उतारिसकेको छ। उनले प्रदेश सदस्यबाट राजीनामा दिएर चुनावी अभियान थालिसकेका छन्।
