घोषणापत्रमा मानव अधिकारका विषय समावेश गर्न आयोगको आग्रह

काठमाडौं- राष्ट्रिय मानवअधिकार आयोगले राजनीतिक दलहरुलाई आफ्नो घोषणापत्रमा मानव अधिकारका विषय समावेश गर्न आग्रह गरेको छ। आयोगले मंगलबार एक विज्ञप्ति जारी गर्दै यस्तो आग्रह गरेको हो ।

आयोगले भनेको छ- ‘आगामी वैशाख ३० गते सम्पन्न हुन गइरहेको स्थानीय तह निर्वाचनको सन्दर्भमा राजनीतिक दलहरूबाट जारी हुने निर्वाचन घोषणापत्र प्रतिवद्धतापत्रमा मानव अधिकारका विषय समावेश गर्न राष्ट्रिय मानव अधिकार आयोग निर्वाचनमा भाग लिने सबै दलहरुलाई आग्रह गर्दछ।’

लोकतान्त्रिक शासन प्रणाली, नागरिक स्वतन्त्रता, मौलिक अधिकार, मानव अधिकार, बालिग मताधिकार र आवधिक निर्वाचन समेतको माध्यमबाट समृद्ध राष्ट्र निर्माण गर्ने नेपालको संविधानको लक्ष्य रहेको र त्यसको कार्यान्वयनको प्रमुख जिम्मेवारी राजनीतिक दलहरूको रहेको आयोग दलहरुलाई स्मरण गराएको छ।

‘समृद्ध राष्ट्र निर्माण गर्ने सन्दर्भमा नागरिकका आर्थिक, सामाजिक, सांस्कृतिक, नागरिक तथा राजनीतिक अधिकारको सुनिश्चिततालाई स्वीकार गरी ती हक अधिकारहरुलाई मौलिक हकको रुपमा नेपालको संविधानले व्यवस्था गरेको सन्दर्भमा त्यसको कार्यान्वयमा राजनीतिक दलको समेत जिम्मेवारी रहन्छ’, विज्ञप्तिमा भनिएको छ।