ज्योतिष र कर्मकाण्ड विधामा लाग्न चाहनेलाई सरकारले तालिम दिने

काठमाडौं – सरकारले ज्योतिष र कर्मकाण्ड सिक्न चाहनेहरुलाई प्रशिक्षणको कार्यक्रम सुरु गर्न लागेको छ । पर्याप्त ज्ञानविना नै ज्योतिष र कर्मकाण्ड विधामा लाग्नेहरुका कारण यो क्षेत्रमा विकृति पैदा भएको भन्दै संस्कृति पर्यटन तथा नागरिक उड्ययन मन्त्रालय अन्तर्गत्को नेपाल पञ्चाङ्ग निर्णायक विकास समितिले प्रशिक्षण दिन लागेको हो ।

समितिले छिट्टै ज्योतिषी र पण्डितहरुको लागि लाइसेन्सको व्यवस्था गर्न लागेको जनाएको छ । लाइसेन्सको व्यवस्था गर्नुपूर्व इच्छुकहरुलाई प्रशिक्षित गरेर योग्य बनाउन सकियोस् भनेर तालिमको व्यवस्था गरेको समितिका सदस्यसचिव सूर्यप्रसाद ढुंगेलले जानकारी दिए ।

उनका अनुसार यो तालिममा सबै जाति, लिंग र सम्प्रदायका मान्छेले सहभागिता जनाउन सक्छन् । तालिम चैत १५ गतेदेखि नारायणहिटी दरबार परिसरमा रहेको विकास समितिको कार्यालयमा सञ्चालन हुने सदस्य सचिव ढुंगेलले जानकारी दिए । तालिम ६ महिनासम्म चल्ने र हरेक दिन अपराह्न ४ बजेदेखि २ घण्टासम्म चल्ने बताइएको छ । सहभागिताको लागि ६ महिनाको १५ हजार शुल्क तोकिएको छ । इच्छुक व्यक्तिले समितिको कार्यालयमा सम्पर्क गर्न सक्ने जानकारी ढुंगेलले दिए ।