

नेपालद्वारा ओमानसमक्ष ११८ रनको लक्ष्य प्रस्तुत

काठमाडौं – आईसीसी पुरुष टी—२० विश्वकप ग्लोबल छनोटअन्तर्गतको पहिलो खेलमा नेपालले ओमानसमक्ष ११८ रनको लक्ष्य प्रस्तुत गरेको छ ।
टस हारेर पहिलो ब्याटिङ गरेको नेपालले आयोजक ओमानविरुद्ध २० ओभरमा ८ विकेट गुमाउँदै ११७ रन बनाएको हो ।
नेपालका ओपनर ब्याट्म्यानद्वय कुशल भुर्तेल र आशिफ शेख क्रमशः ५ र ४ रन बनाउँदै आउट भए । नेपालले १२ रन बनाउँदा आफ्ना दुवै ओपनर गुमाएको थियो ।
त्यसपछि पूर्वकप्तान ज्ञानेन्द्र मल्ल र पूर्वउपकप्तान दीपेन्द्र सिंह ऐरीले पारी सम्हाल्ने कोशिश गरेपछि नेपालको ३३ रन पुग्दा मल्ल १५ रन बनाउँदै आउट भएपछि नेपाल सम्हालिन सकेन । त्यसलगत्तै नेपालले ऐरीलाई पनि व्यक्तिगत ११ रनमा आउट भए ।
त्यसपछि नेपालका लागि आरिफ शेख र लोकेश बमले पारी सम्हाल्ने कोशिस गरेपनि १ छक्काको मद्दतले १६ रन बनाउँदै बम आउट हुँदा नेपालले १३.२ ओभरमा ६७ रन बनाएको थियो । बम आउटभएपछि आएका विवेक यादव ७ रन बनाउँदै आउट भए भने त्यसपछि आएका कमल ऐरी भने १ रन बनाएर आउट भए ।
त्यसपछि आरिफ शेखलाई कप्तान सन्दीप लामिछाने राम्रो साथ दिँदै गर्दा आरिफले ३८ रन बनाए । आरिफ अन्तिम बलमा रनआउट बन्न पुगे । कप्तान लामिछाने भने १६ रन बनाउँदै नटआउट रहे ।
ओमानका खबर अलीले ३ विकेट लिए भने बिलाल खानले २ विकेट हात पारे । त्यस्तै फयाज बट र जिसम मक्सुदले १/१ विकेट हात पारे ।
अब केही बेरमा घरेलु टोली ओमानले ब्याटिङ सुरु गर्नेछ ।
आजको खेल जितेर विश्वकप छनोटमा सुखद सुरुआत गर्ने दाउमा रहेको नेपालले सुरुवातमै नराम्रो झट्का बेहोरेको छ । यसअघि ओमानमै भएको चारदेशीय टी-२० सिरिजमा नेपालले ओमानलाई ६ विकेटले पराजित गरेको थियो ।

