धनुषामा यात्रुबाहक बस पल्टियो, अचानक आगलागी

काठमाडौं – धनुषामा बुधबार बिहान यात्रुबाहक बस दुर्घटनामा परेको छ। बस दुर्घटनामा १२ जना घाइते भएका छन् भने बसका चालक र सहचालक फरार रहेको प्रहरीले जनाएको छ।

धनुषाधाम नगरपालिका–६ मालटोलस्थित पूर्व–पश्चिम लोकमार्गमा पश्चिम दाङबाट पूर्व विराटनगरको लागि जाँदै गरेको ना ६ ख ७१०२ नम्बरको यात्रुबाहक बस आफैं अनियन्त्रित भई सडकको दाहिने साइडमा पल्टिँदा अचानक आगलागी भएको हो।

बस पल्टिएको खबरलगत्तै इलाका प्रहरी कार्यालय यज्ञभूमि धनुषाबाट प्रहरी नायब निरीक्षक, इलाका प्रहरी कार्यालय ढल्केबरबाट प्रहरी निरीक्षकको कमाण्डमा प्रहरी टोली र दंगा नियन्त्रण प्रहरी गणबाट बारुणयन्त्रको टोली घटनास्थलमा पुगेको थियो।

बस पल्टिएलगत्तै आगजानीबाट मानवीय क्षति हुन नपाएको इलाका प्रहरी कार्यालय ढल्केबरका प्रहरी निरीक्षक (इन्स्पेक्टर) प्रदीप सुवेदीले जानकारी दिए। सुवेदीका अनुसार आगलागी अन्दाजी ८ः२५ बजेतिर नियन्त्रणमा आएको थियो।

आगलागीबाट बस पूर्ण रुपमा जलेर नष्ट भएको छ। फरार रहेका चालक र सहचालकको खोजीकार्य जारी रहेको इन्स्पेक्टर सुवेदीले बताए।

बस दुर्घटनामा घाइतेहरुको सबैको उपचार भइरहेको छ। सुनसरी धरान नपा–१६ बस्ने अन्दाजी ४२ वर्षीय मुना सुवेदीको टाउको र बाँया हातमा चोक लागेको हुँदा उनको मोडेल अस्पताल लालगढमा उपचार भइरहेको प्रहरीले जनाएको छ।

यस्तै इटहरी नपा–४ बस्ने ३७ वर्षीय रेखा डाँगीको पनि बाँया खुट्टा र टाउकोमा चोट लागेको हुँदा उनको पनि लालगढमै उपचार भइरहेको छ। रुकुम त्रीवेणी गापा–९ का २६ वर्षीय टिका ओली पनि घाइते भएको हुँदा उनको भोगेन्द्र मेडिकल पुरुपलपुरमा उपचार भइरहेको छ।

त्यसैगरी घाइते हुनेहरुमा दाङ मुसुरे गापा–९ का २४ वर्षीय शिव कुमार चौधरी, रुकुम त्रीवेणी गापा–९ का ६० वर्षीय डाडाविर डाँगी, रुकुमकै २८ वर्षीय कृष्ण बहादुर ओली, सल्यान बनगाड कोपिण्डे नपा–८ का २३ वर्षीय टिका डिसी, झापा मेची नपा–१ का २८ वर्षीय कल्याण आचार्य रहेका छन्।

इन्स्पेक्टर सुवेदीका अनुसार दुर्घटनामा सिरहा कर्जनाहा नपा–२ का ४१ वर्षीय शान्ति कार्की, मोरङ रंगेली नपा–८ का ३६ वर्षीय सजिजता आचार्य, मोरङकै ३१ वर्षीया बालिका डिसी र प्यूठान माणडवी गापा–२ का अन्दाजी २४ वर्षीय केशव घर्ती समेत घाइते भएका छन्।

बसका चालक सप्तरी छिन्नमस्ता गापा–५ का ४० वर्षीय भगवती प्रसाद कर्ण भने फरार रहेका छन्। घटनाबारे थप अनुसन्धान भइरहेको प्रहरीले जनाएको छ।