पानीको बहाव थेग्न नसकेर कमला नदीको पुल फेरि भासियो

जनकपुर – सिरहा जोड्ने कमला नदीको पुल पून भासिएको छ । दुई दिनदेखि भइरहेको अबिरल वर्षाले नदीमा बढेको पानीको बहाव थेग्न नसकेर पुलको पिलर भासिएको हो ।

हुलाकी सडकको मेरुदण्डको मानिने यो पुलको पश्चिमतिरबाट तेस्रो नम्बरको पिलर भासिएको धनुषा प्रहरीले जानकारी दिएको छ । दुई फिट जति पिलर भासिएको सूचना आएको छ ।

यसअघि गएको असारमा आएको बाढीले पूर्व तर्फबाट यो पुलको दोस्रो नम्बरको स्पान भासिएको थियो । लामो समयदेखि पुल निर्माण कार्य सम्पन्न नहुँदा सर्वसाधारण तथा किसानले डुंगा चढेर आवात जावत गर्दै आएका छन् ।