रुसको आक्रमणमा युक्रेनमा ३ जनाको मृत्यु

किभ-  रुसले बुधबार राति युक्रेनमाथि गरेको ड्रोन र मिसाइल आक्रमणमा कम्तीमा ३ जनाको मृत्यु भएको छ। राजधानी किभका मेयर भिताली क्लिट्स्कोका अनुसार मृतकमध्ये एक १२ वर्षीय बालक पनि रहेका छन्। आक्रमणमा कम्तीमा १८ जना घाइते भएका छन्।

दक्षिणपूर्वी सहर डिनिप्रोमा पनि एक जनाको ज्यान गएको छ भने अन्य थुप्रै सहरहरूमा आक्रमण भएको जनाइएको छ। यसैबीच, रुसको क्रास्नोडार क्राइ क्षेत्रमा युक्रेनी ड्रोन आक्रमण हुँदा ५ र १४ वर्षका दुई बालबालिकाको मृत्यु भएको त्यहाँका गभर्नर भेनियामिन कोन्ड्राट्येभले बताएका छन्।

यी आक्रमणहरू हालैको अर्थोडक्स इस्टरका अवसरमा गरिएको छोटो युद्धविरामपछि भएका हुन्। युद्धविराम अवधिमा दुवै पक्षले एकअर्कामाथि सयौँ उल्लङ्घनको आरोप लगाएका थिए।

किभको पोडिल्स्की जिल्लामा १६ तले आवासीय भवन ध्वस्त हुँदा उद्धारकर्मीहरूले भग्नावशेषबाट एक आमा र बच्चालाई जीवितै उद्धार गरेका छन्। राजधानीको उत्तरी क्षेत्रमा निरन्तर गोलाबारीका कारण चार जना आपतकालीन स्वास्थ्यकर्मी घाइते भएका छन्।

डिनिप्रोमा भएको अर्को आक्रमणमा कम्तीमा १० जना घाइते भएका छन् र विभिन्न भवनहरूमा आगलागी भएको जनाइएको छ। अन्य क्षेत्रहरूमा पनि आक्रमण जारी रहेको छ।

यसैगरी, खार्किभमा ड्रोन आक्रमणबाट दुई वृद्ध घाइते भएका छन् भने ओडिसामा पाँच जना घाइते भएका छन्।