राष्ट्रियसभा निर्वाचन : कर्णालीमा कांग्रेस–एमाले गठबन्धन विजयी

आइतबार सम्पन्न मतदानमा दुई दलबीचको गठबन्धनबाट उम्मेदवार बनेका ललितजंग शाही र मिनासिंह रखाल निर्वाचित भएका हुन् । शाही कांग्रेसका तर्फबाट तथा रखाल एमालेकी तर्फबाट विजयी भएका हुन् ।

अन्य क्लस्टरबाट उम्मेदवार बनेका शाहीले प्रदेशसभा सदस्यतर्फ २६ र स्थानीय तहबाट १०० मतभार प्राप्त गर्दै विजयी भए । उनका प्रतिद्वन्द्वी नेपाली कम्युनिस्ट पार्टीका बुद्धिप्रसाद शर्माले प्रदेशतर्फ १३ र स्थानीयतर्फ ५० मतभार प्राप्त गरी पराजित भए ।

यस्तै, महिला क्लस्टरबाट उम्मेदवार बनेकी एमालेकी रखालले प्रदेशतर्फ २६ र स्थानीयतर्फ ९३ मतभारसहित विजय हासिल गरिन् । उनकी प्रतिद्वन्द्वी नेकपाकी अञ्जु महतारा शाहीले प्रदेशतर्फ १३ र स्थानीयतर्फ ५५ मतभार प्राप्त गर्दै पराजित भइन् ।

निर्वाचनमा प्रदेशसभा सदस्यतर्फ ३९ जना र स्थानीय तहका १५२ जना मतदाताले मतदान गरेका थिए ।