९ कार्यालयबाट इम्बोस्ड नम्बर प्लेट जडान सुरु, १ असोजदेखि थप ७ कार्यालयमा

काठमाडौं – सरकारले इम्बोस्ड नम्बर प्लेट अनिवार्य गरेसँगै अहिले विभिन्न ९ वटा कार्यालयबाट यसको जडान भइरहेको यातायात व्यवस्था विभागले जनाएको छ।

बागमती प्रदेशमा यातायात व्यवस्था कार्यालय एकान्तकुना ललितपुर, यातायात व्यवस्था सेवा कार्यालय हेटौंडा मकवानपुर, यातायात व्यवस्था कार्यालय गुर्जुधारा र सवारी परीक्षण कार्यालय टेकुबाट इम्बोस्ड नम्बर जडान भइरहेको छ। गण्डकी प्रदेशमा कास्की पोखरामा, लुम्बिनी प्रदेशमा रुपन्देही बुटवल, दाङ तुल्सीपुर र नेपालगञ्ज बाँकेमा, कर्णाली प्रदेशमा सुर्खेतमा जडान सुरु भएको छ।

विभागका अनुसार १ असोजदेखि थप ७ कार्यालयबाट इम्बोस्ड नम्बर जडान थालिनेछ। सुदूरपश्चिममा धनगढी र कञ्चनपुर, मधेशमा लहान सिरहा, बागमतीमा चितवन, कोशी प्रदेशमा सुनसरी इटहरी र झापा बिर्तामोडमा १ असोजदेखि जडान सुरु हुने छ।

संघ र प्रदेशका मन्त्रीस्तरीय विषयगत समिति बैठकले १ असोजदेखि सवारीसाधन दर्ता, नामसारी वा नवीकरणमा इम्बोस्ड नम्बर अनिवार्य गर्ने निर्णय गरेको छ। विभागले भनेका छन् कि नागरिकले आफूलाई पायक पर्ने समय र कार्यालयमा गएर नम्बर प्लेट जडान गर्न सक्नेछन्।

निकट भविष्यमा सबै सवारीसाधनमा इम्बोस्ड नम्बर प्लेट जडान भई विवरण डिजिटाइज हुने योजना रहेको छ। सरकारले नेपालभरि १० स्थानमा मुख्य प्रवेशद्वारमा आरएफआईडी गेट निर्माण गर्ने योजना बनाएको छ, जसमा काठमाडौंका दुई स्थानमा निर्माण सम्पन्न भई प्रयोगमा समेत ल्याइएको छ।