स्याल बचाउन खोज्दा पोखराबाट जनकपुर जाँदै गरेको बस दुर्घटना, १२ जना घाइते

रौतहट — रौतहटको चन्द्रनिगाहपुरमा यात्रुबाहक बस दुर्घटना हुँदा १२ जना यात्रु घाइते भएका छन् । पोखराबाट जनकपुरतर्फ जाँदै गरेको ग१ख ५८०७ नम्बरको बस चन्द्रपुरको लचका नजिकै दुर्घटना हुँदा १२ जना घाइते भएका हुन् ।

बाटो काट्दै गरेको स्याललाई बचाउने क्रममा दुर्घटना भएको प्रहरीले जनाएको छ । रौतहटका प्रहरी प्रवक्ता डिएसपी दीपक रायका अनुसार बसमा २० यात्रु सवार रहेकोमा १२ जना घाइते भएका हुन् ।

बस चालक दोलखा सैलुङ गाउँपालिका ८ बस्ने ३५ वर्षीय पदम बहादुर बस्नेत र सह चालक बाराको करैयामाई गाउँपालिका ७ बस्ने ३० वर्षीय सुरज पौडेललाई प्रहरी चौकी पौराहीको नियन्त्रणमा लिएर थप अनुसन्धान गरिरहेको डिएसपी रायले जानकारी दिए ।

घाइतेहरु मध्ये एक जनाको अवस्था गम्भीर, तीन जनाको मध्यम र ८ जनाको अवस्था सामान्य रहेको र उनीहरुको विभिन्न अस्पतालहरुमा उपचार भइरहेको जिल्ला प्रहरी कार्यालय रौतहटले जनाएको छ ।