निर्माणमा अनियमितता गरेको भन्दै प्रमुख प्रशासकीय अधिकृतसहित ३ जनाविरुद्ध मुद्दा

काठमाडौं- अख्तियार दुरुपयोग अनुसन्धान आयोगले तत्कालीन प्रमुख प्रशासकीय अधिकृतसहित ३ जना विरुद्ध भ्रष्टाचार मुद्दा दर्ता गरेको छ ।

आयोगले सोमबार बिशेष अदालत काठमाडौँमा रौतहट जिल्लाको ईशनाथ नगरपालिका तत्कालीन प्रमुख प्रशासकीय अधिकृत किशोर गुप्ता, नगरपालिकाका तत्कालीन इन्जिनियर सत्पपाल सौरभ र र आधारभूत विद्यालय लल्मिनिया जटहराका तत्कालीन प्रधानाध्यापक मुहमद समिम अख्तर विरुद्ध भ्रष्टाचार मुद्दा दायर गरेको हो ।

उक्त विद्यालयको २ कोठे पक्की भवन निर्माण गर्दा मापदण्ड, गुणस्तर र इष्टिमेट विपरीतको कार्य गरी भ्रष्टाचार गरेको उनीहरुमाथि आरोप लगाईएको छ ।

आयोगले प्रमुख प्रशासकीय अधिकृतलाई २ लाख ३५ हजार ८९५, इन्जिनियर सौरभलाई ८६ हजार ६४७ रुपैयाँ र प्रधानाध्यापक अख्तरलाई ३ लाख ३ हजार ७९७ रुपैयाँ बिगो दाबी गरी आरोपपत्र दायर गरिएको अख्तियारले जनाएको छ ।