धनकुटाको बेलटारमा सवारी दुर्घटना हुँदा ११ जना घाइते

हिले – धनकुटाको महालक्ष्मी नगरपालिका-४ बेलटारमा सवारी दुर्घटना हुँदा ११ जना घाइते भएका छन् । सङ्खुवासभाको चैनपुरबाट सुनसरीको इटहरी जाँदै गरेको को १ ज २२७५ नम्बरको बोलेरो गाडी अनियन्त्रित भई दुर्घटना हुँदा ११ जना घाइते भएका हुन् ।

बोलेरो सडकबाट करिब ५० मिटर तल खसेर दुर्घटना भएको प्रहरीले जनाएको छ । दुर्घटनामा घाइते भएका ७ जनाको सुनसरीको धरानस्थित बिपी कोइराला स्वास्थ्य विज्ञान प्रतिष्ठानमा र ४ जनाको जिल्ला अस्पताल धनकुटामा उपचार भइरहेको धनकुटा प्रहरी प्रमुख एसपी लक्ष्मीराज अधिकारीले जानकारी दिए ।

घटना भएको खबर पाउने बित्तिकै प्रहरी चौकी चानुवा र प्रहरी चौकी लेगुवाबाट खटिएको प्रहरीले तत्काल उद्धार गरी उपचारका लागि पठाएको उनले बताए । बोलेरो चालक मोरङको बेलबारी नगरपालिका-२ का प्रवीण कोइराला प्रहरी चौकी लेगुवाको नियन्त्रणमा रहेको प्रहरीले जनाएको छ ।