

७ हजारभन्दा बढी मोटरसाइकल चालक कारबाहीमा

रौतहट – कागजपत्र तथा लाइसेन्स नबोकी यात्रा गर्ने ७ हजार ३७४ जना मोटरसाइकल चालक कारबाहीमा परेका छन्। यो जिल्ला ट्राफिक कार्यालय रौतहटले उपलब्ध गराएको ६ महिनाको तथ्यांक हो।
ट्राफिकले सवारी नियम उल्घंन गर्ने चालकलाई कडाइ गरेसँगै गत पुस १८ गतेसम्मको तथ्याङक अनुसार रौतहट ट्राफिकले एक करोड २१ लाख ९० हजार रुपैयाँ राजस्व असुली गरेको छ। यो आर्थिक वर्षमा १५ हजार ८८४ वटा सवारी साधनलाइ कारबाही गर्दा एक करोड २१ लाख ९० हजार राजस्व संकलन गरेको जिल्ला ट्राफिक कार्यलयले जनाएको छ।
गएको साउनमा १० लाख १४ हजार ५ सय, भदौमा २० लाख, असोजमा १७ लाख १३ हजार, कार्तिकमा २९ लाख ३२ हजार ५ सय, मंसिरमा २८ लाख ९० हजार ५ सय र पुस १८ गतेसम्म १६ लाख ४८ हजार ५ सय राजस्व संकलन भएको ट्राफिक कार्यालय रौतहटकी प्रमुख बिमला कठायतले जानकारी दिइन्।
साउन यता रौतहटमा सवारी र्दुघटनाबाट २३ जनाले ज्यान गुमाएका छन्। ५०३ जना घाइते भएका छन्। प्रहरी निरिक्षक कठायतले रौतहटमा विभिन्न विद्यालयमा ट्राफिक नियम जानकारी कक्षा, छड्के चेकिङ, विभिन्न चोकमा ट्राफिक सचेतना कार्यक्रमलगायतका अभियान चलाइएको उनले बताइन्।

