बैंक ठगीको आरोपमा ६ जना पक्राउ

काठमाडौं – अमेरिकाबाट अवैध रुपमा नेपालमा रकम भित्राउन खोज्ने पृथ्वी शाह सहितका ६ जनालाई प्रहरीले पक्राउ गरेको छ । शुक्रबार केन्द्रीय अनुसन्धान ब्यूरो सिआइबीको टोलीले उनीहरुलाई पक्राउ गरेको छ ।

शाहलाई ठगी मुद्दामा कारवाही गर्नका लागि काठमाडौं जिल्ला अदालतबाट पक्राउ अनुमति लिइएको थियो । केन्द्रीय अनुसन्धान ब्यूरो (सिआइबी) का प्रमुख एआइजी उत्तम सुवेदीका अनुसार शाह लगायतका ६ जनालाई ठगी मुद्दामा कारवाहीका लागि पक्राउ गरिएको हो ।

उनीहरुले नेपालका केही बैंक र अमेरिकामा पनि ठगी गरेको उजुरी परेपछि पक्राउ गरिएको हो । शाहको समूहले नेपालको सिद्धार्थ बैंक लगायतका केही बैंकलाई पनि ठगी गरेको पाइएको छ । तत्कालका लागि ठगी मुद्दामा मात्रै कारवाही सुरु हुने भएपनि अनुसन्धानका क्रममा डलरको अवैध तस्करी, क्रिप्टोकरेन्सी लगायतका विषयमा पनि अनुसन्धान हुने प्रहरीले बताएको छ ।

शाहले केही समयअघि अमेरिकाबाट नेपाल पठाएको पैसा नेपाल राष्ट्र बैंकले रोक्का राखेको थियो । उक्त रकम फुकुवा गर्न शाहले विभिन्न शक्तिकेन्द्रमा दबाब दिएको समाचार बाहिर आएको थियो ।