भारतले चीनसँगको समन्वयमा लिपुलेकबाट कैलाश मानसरोवर यात्रा खुलायो

काठमाडौं-  भारतको विदेश मन्त्रालयले सन् २०२६ का लागि कैलाश मानसरोवर यात्राको औपचारिक घोषणा गरेको छ। चीन सरकारसँगको समन्वयमा आगामी जुनदेखि अगस्ट महिनासम्म धार्मिक यात्रा सञ्चालन गरिने जनाइएको छ।

यस वर्ष यात्राका लागि दुईवटा मार्ग तय गरिएको छ। पहिलो मार्ग उत्तराखण्डको लिपुलेक भञ्ज्याङ हुँदै हुनेछ, जहाँ ५० जनाका दरले १० वटा समूह पठाइनेछ। दोस्रो मार्ग सिक्किमको नाथुला भञ्ज्याङ हुँदै हुनेछ, जहाँ पनि ५० जनाका दरले १० वटा समूह यात्रा गर्नेछन्। दुवै मार्गबाट गरी यस वर्ष कुल १ हजार तीर्थयात्रीले कैलाश मानसरोवरको दर्शन गर्नेछन्।

भारतीय विदेश मन्त्रालयका अनुसार यात्रामा सहभागी हुन इच्छुक तीर्थयात्रीले ‘kmy.gov.in’ वेबसाइटमार्फत अनलाइन आवेदन दिन सक्नेछन्। छनोट प्रक्रिया पूर्ण रूपमा कम्प्युटर प्रणालीमार्फत निष्पक्ष, र्यान्डम तथा लैङ्गिक सन्तुलनका आधारमा गरिने जनाइएको छ।

मन्त्रालयले आवेदनदेखि छनोटसम्म सम्पूर्ण प्रक्रिया अनलाइनमार्फत हुने भएकाले कागजी पत्राचार वा फ्याक्स पठाउन नपर्ने स्पष्ट पारेको छ। आवश्यक जानकारी तथा सुझावका लागि वेबसाइटमै फिडब्याक विकल्प उपलब्ध गराइएको छ।

आवेदकहरूले आफ्नो इच्छाअनुसार लिपुलेक वा नाथुला मार्गमध्ये कुनै एक वा दुवै मार्ग छनोट गर्न सक्नेछन्। आवेदन दर्ता गर्ने अन्तिम मिति मे १९, २०२६ तोकिएको छ।