मन्त्री भएकै भोलिपल्ट गृहप्रदेश जाँदै खेलकुदमन्त्री बब्लु, गृहमन्त्री र कानुनमन्त्री पनि सँगै जाने
कागजपत्र |
काठमाडौं – नेपाल सरकारका तीनमन्त्री र एक सचिव मधेसको सुरक्षा व्यवस्था अध्ययनका लागि आज मधेस प्रदेश जाँदैछन्।
गृहमन्त्री ओम प्रकाश अर्याल, उद्योग र कानुनमन्त्री अनिलकुमार सिह्ना, युवा तथा खेलकुदमन्त्री बब्लु गुप्ता सोमबार मधेस जाने भएका हुन्।
गुप्ताले आइतबार मात्रै मन्त्री पदको सपथ लिएका हुन् । उनी मन्त्री बनेको भोलिपल्टै गृहप्रदेश जाने भएका हुन् ।
उनीहरूसँगै गृहमन्त्रालयका सचिव रामेश्वर दंगाल पनि मधेस जानेछन्। आगामी फागुन २१ गतेका लागि तय भएको प्रतिनिधि सभाको निर्वाचनका लागि आवश्यक सुरक्षा व्यवस्थाबारे बुझ्न उनी सोमबार जनकपुर जानेछन्।
उनीहरू सोमबार र मंगलबार मधेसमै रहनेछन्। यसबीचमा उनीहरूले सुरक्षा निकायका विभिन्न कार्यालय अवलोकन, सरकारी कार्यालयका प्रमुखहरूसँग छलफल गर्नेछन्।
त्यस्तै त्यहाँ छठसम्बन्धी कार्यक्रममा पनि उनीहरू सहभागी हुनेछन्। सोमबार नै ऊर्जामन्त्री कुलमान घिसिङ भारत जाँदैछन्।
