पेट्रोलियम पदार्थको मूल्यवृद्धि विरुद्ध विरोध प्रदर्शन, प्रहरीमाथि ढुङ्गा प्रहार

काठमाण्डौ – निरन्तर भैरहहेको पेट्रोलियम पदार्थको मूल्यवृद्धि विरुद्ध सोमबार काठमाडौंमा विरोध प्रदर्शन भएको छ । मूल्यवृद्धिको विरोधमा नेकपा एमालेको खनाल-नेपाल पक्षको अनेरास्ववियु र नेपाली कांग्रेसको विद्यार्थी सङ्गठन नेविसङ्घले सोमवार काठमाण्डौमा विरोध प्रदर्शन गरेको हो । उनीहरुले मूल्यवृद्धि फिर्ता लिन माग गरेका छन् ।

अनेरास्ववियु आबद्ध विद्यार्थीहरूले बबरमहलमा रहेको नेपाल नेपाल आयल निगमको कार्यालय अगाडि र नेविसङ्घ आबद्ध विद्यार्थीहरूले त्रिचन्द्र कलेज अगाडि प्रदर्शन गरेका हुन् । त्रिचन्द्र कलेज अगाडि प्रदर्शनकारी र प्रहरीबीच झडप पनि भएको छ । प्रदर्शनकारीले प्रहरीमाथि ढुङ्गा तथा इँटा प्रहार गरेपछि स्थिति केही समय तनावग्रस्त बनेको थियो ।

अनेरास्ववियुले विरोध प्रदर्शनपछि निगमका कार्यकारी निर्देशक सुरेन्द्रकुमार पौडेलसमक्ष ज्ञापनपत्र पनि बुझाएको छ । ज्ञापनपत्र बुझाउँदै अनेरास्ववियुका अध्यक्ष सुदेश पराजुलीले मूल्यवृद्धिबाट लाखौँ विद्यार्थी मात्रै नभइ आम नागरिकलाई समस्या पर्ने भएकाले यसलाई स्वीकार्न नसकिने बताए । ज्ञापनपत्र बुझ्दै निगमका कार्यकारी निर्देशक पौडेलले प्रत्येक पन्ध्र-पन्ध्र दिनमा मूल्य समायोजन गर्ने व्यवस्था अनुरूप मूल्यवृद्धि गरिएको बताए। यद्यपि विद्यार्थीहरूको माग जायज भएकाले ज्ञापनपत्रलाई उद्योग, वाणिज्य तथा आपूर्ति मन्त्रालयमा पठाउने समेत उनले बताए ।

निगमले आइतवार रातिदेखि लागू हुने गरी पेट्रोल, डिजल र मट्टीतेलमा प्रतिलिटर दुईरदुई रुपैयाँ बढाएको थियो । नयाँ बिक्री मूल्यअनुसार पेट्रोल प्रतिलिटर एक सय २० र डिजल तथा मट्टीतेल प्रतिलिटर समान एक सय तीन रुपैयाँ पुगेको छ ।