संसदका दुवै सदनको बैठक बस्ने कार्यसूची, बस्ला त आज ?

काठमाडौं – सघीय संसद्को दुवै सदनको बैठक बस्दै छ।

प्रतिनिधिसभाको बैठक आज दिउँसो १ बजे र राष्ट्रियसभाको बैठक दिउँसो १ः१५ बजे बस्ने कार्यतालिका छ।

प्रतिनिधिसभाको बैठकमा उपप्रधानमन्त्री एवं अर्थमन्त्री विष्णुप्रसाद पौडेलले ‘आगामी आर्थिक वर्ष २०८२र/३ को राजश्व र व्ययको वार्षिक अनुमान (बजेट)माथि सामान्य छलफल गरियोस्’ भन्ने प्रस्ताव पेस गर्ने र प्रस्तावमाथि छलफल हुने सम्भावित कार्यसूची छ।

बैठकमा राज्यव्यवस्था तथा सुशासन समितिका सभापति रामहरि खतिवडाले ‘संघीय निजामती सेवा विधेयकसम्बन्धी समितिको प्रतिवेदन, २०८२’ पेस गर्ने सम्भावित कार्यसूची रहेको संसद् सचिवालयले जनाएको छ।

विषयगत समितिमा सदस्य हेरफेर र प्रधानमन्त्रीको कार्यालयबाट प्राप्त कार्यभार सम्बन्धी पत्रको व्यहोरा सभामुख देवराज घिमिरेले जानकारी गराउने सम्भावित कार्यसूचीमा उल्लेख छ। तर भिजिट भिसा प्रकरणमा गृहमन्त्री रमेश लेखकले राजीनामा दिनुपर्ने मागसहित विपक्षी दलहरुले गत जेठ १३ गतेबाट प्रतिनिधिसभा बैठक अवरुद्ध गरिरहेका छन्। उनीहरुले जेठ १५ मा बजेट पेस गर्न भने दिएका थिए। तर, त्यसपछि निरन्तर अवरुद्ध संसद आज पनि चल्ने सम्भावना न्यून रहेको छ।

यसैगरी राष्ट्रियसभाको बैठकमा आगामी आर्थिक वर्ष २०८२/८३ को राजश्व र व्ययको वार्षिक अनुमान बजेट माथिको छलफल जारी रहने संसद् सचिवालयले जनाएको छ।

तर विपक्षीहरुको अवरोधका कारण यसअघि पनि बस्ने भनिएको बैठकहरु अवरुद्ध हुँदै आएका छन् ।