शैक्षिक क्यालेन्डर लागू गरेकोमा ‘प्रचण्ड’ले त्रिविलाई दिए धन्यवाद

काठमाडौँ – त्रिभुवन विश्वविद्यालयले शैक्षिक क्यालेण्डर लागू गरेकोमा निवर्तमान प्रधानमन्त्री पुष्पकमल दाहाल ‘प्रचण्ड’ले विश्वविद्यालयका पदाधिकारीहरूलाई धन्यवाद दिएका छन् ।

आइतबार प्रधानमन्त्रीको निजी निवास खुमलटारमा त्रिविका उपकुलपति प्रा. डा. केशरजंग बराल, रजिष्टार डा. केदारप्रसाद रिजाल, शिक्षाध्यक्ष डा. खड्ग केसीसँग भेट गर्दै ‘प्रचण्ड’ले धन्यवाद दिएका हुन् ।

भेटमा त्रिभुवन विश्वविद्यालयका पदाधिकारीहरूको नियुक्तिका आधार र मापदण्ड सम्बन्धी विनियम कार्यकारी परिषद्बाट पारित गरेकोमा समेत ‘प्रचण्ड’ले धन्यवाद दिए ।

‘प्रचण्ड’ल भने, ‘विश्वविद्यालयमा गुणात्मक सुधार ल्याएर मात्रै देशको मुहार फेर्न सकिन्छ। त्यसका लागि मैले लगातार मेहनत गर्दै आएको छु । खुला प्रतिस्पर्धाबाट पदाधिकारी नियुक्ति, शैक्षिक क्यालेण्डर लगायतका क्षेत्रमा महत्त्वपूर्ण सुधार आएको छ। यसले राम्रो सन्देश दिएको छ। भविष्यमा समेत यी प्रयासहरू लागू हुनेछन् भन्ने विश्वास व्यक्त गर्दछु ।’

भेटमा पदाधिकारीहरूले ‘प्रचण्ड’को कार्यकालमा शिक्षा क्षेत्र र विश्वविद्यालय सुधारमा ऐतिहासिक कामहरू भएको भन्दै त्रिवि सुधारमा आफूहरू पूर्ण समर्पण भावका साथ खटिने बताएका छन् ।