बस दुर्घटना अपडेट : मृतकको संख्या ५१ पुग्यो, ४ जना बेपत्ता

नयाँदिल्ली – भारतको मध्यप्रदेशमा भएको बस दुर्घटनामा मृत्यु हुनेको संख्या ५१ पुगेको छ । मध्यप्रदेशको सिधी जिल्लामा मंगलबार बिहान बस दुर्घटना भएको थियो ।

उक्त बस सिधीबाट सतना जाने क्रममा सरदा गाउँ नजिक २२ फिट गहिरो बाणसागर नहरमा खसेको थियो। दुर्घटनास्थलबाट ५१ जनाको शव निकालिएको भारतीय मिडियाहरुले उल्लेख गरेका छन् ।

७ जना सकुशल छन् भने चार जना हराइरहेका छन् । चालक पौडिएर नहरबाट बाहिर निस्किएका थिए । उनलाई प्रहरीले नियन्त्रणमा लिएको छ । बसमा क्षमताभन्दा धेरै यात्रु रहेकाले दुर्घटना भएको स्थानीय प्रहरीले जनाएको छ ।

३२ जना क्षमताको सो बसमा चालकसहित ६२ जना सवार थिए । एजेन्सी