मन्त्री बनाउन नेतृत्वले पैसा लिएको प्रमाणित गर्न रास्वपा सांसद झाको चुनौती

काठमाडौं – राष्ट्रिय स्वतन्त्र पार्टीका सांसद मनिष झाले मन्त्री बनाउन पार्टी नेतृत्वले पैसा लिएको भए प्रमाणित गरेर देखाउन चुनौती दिएका छन् । आज (सोमबार) संघीय संसद भवन परिसरमा सञ्चारकर्मीहरुसँग कुरा गर्दै उनले पार्टी सभापति रवि लामिछानेले करोडौं लिएर मन्त्री बनाउने गरेको आरोपलाई अस्विकार गरे ।

पार्टीका सांसद डा. ढाकाकुमार श्रेष्ठले मन्त्री बनाउनका लागि साढे २ करोड मागेको भन्ने कुरा पनि सत्य नभएको उनको जिकिर छ । नेपाली कांग्रेसमा आवद्धहरुले सभापति रविले शिक्षामन्त्री बनाउन ८ करोड लिएको भनेर ट्वीटरमा लेखेको आफूले पनि देखेको उल्लेख गर्दै सांसद झाले पुष्टि गर्न चुनौती दिए ।

चुनावका बेला यस्तो स्टन्ट भएको आरोप लगाउँदै सांसद झाले आरोप लगाउने कांग्रेसभित्र नै त्यस्तो हुने गरेको प्रमाण आफूहरुसँग रहेको उनले दाबी गरे । ‘त्यसमा म विश्वास गर्दिन । त्यो स्टयाटस लेखेर चुनावका बेलामा स्टन्ट गर्ने हो भने कति दाइ भाउजूले के–के लिए भन्ने कुरा त हामीलाई पनि थाहा छ नि । हामीले प्रमाण पेस गरेपछि कारबाही गर्छ त्यो दलले ? म चुनौति गर्न चाहन्छु,’ उनले भने ।