राष्ट्रपति निर्वाचनबारे सांसदहरुलाई एमालेको अभिमुखीकरण

काठमाडौँ – नेकपा (एमाले) ले आफ्ना सांसदहरुलाई राष्ट्रपति निर्वाचनबारे आफ्ना अभिमुखीकरण गराएको छ ।

ललितपुरको च्यासलस्थित पार्टी मुख्यालयमा एमालेले प्रतिनिधि सभा, राष्ट्रिय सभा र प्रदेश सभाका सांसदलाई अभिमुखीकरण गराएको हो ।

अभिमुखीकरण कार्यक्रममा एमाले अध्यक्ष केपी शर्मा ओलीले एमालेका तर्फबाट राष्ट्रपतिका उम्मेदवार बनेका सुवासचन्द्र नेम्वाङलाई जिताउन पार्टीले लिएको रणनीति, विपक्षी पार्टीका मतदाता तान्ने रणनीति र वर्तमान राजनीतिक अवस्थाका बारेमा जानकारी गराएका थिए।

उनले राष्ट्रपतिको निर्वाचनमा एमालेका तर्फबाट उम्मेदवार बनेका नेम्वाङको जित सुनिश्चित भएको बताए। उनले लोकतन्त्रको रक्षा गर्नका लागि सबै राजनीतिक दलसँग एमालेले सहकार्य गर्ने बताए। राष्ट्रपतिका उम्मेदवार नेम्वाङले राष्ट्रपतिमा निर्वाचित भएपछिको आफ्नो पहिलो दायित्व संविधानको रक्षा गर्ने हुने बताए।

अभिमुखीकरण कार्यक्रममा उपाध्यक्ष विष्णुप्रसाद पौडेल, महासचिव शङ्कर पोखरेल, उपमहासचिव पृथ्वी सुब्बा गुरुङ, सचिवद्वय गोकर्ण विष्ट, छविलाल विश्वकर्मा, टोपबहादुर रायमाझी लगायतको नेताहरूको सहभागी थियो।

एमालेले राष्ट्रपतिमा नेम्वाङलाई उम्मेदवार बनाएको छ भने नेपाली काँग्रेसले नेता रामचन्द्र पौडेललाई उम्मेदवार बनाएको छ। राष्ट्रपति चयनका लागि यही फागुन २५ गते मतदान हुँदैछ।