तारा एयर दुर्घटनाः अमेरिकाबाट फर्केका दुई छोरीसँग घुम्न जाँदै थिए गोरखाका श्रेष्ठ दम्पती!

काठमाडौं – तारा एयरको विमान दुर्घटना हुँदा गोरखाका एकै परिवारका चार जनाको मृत्यु भएको छ।

आइतबार पोखराबाट जोमसोमका लागि उडेको तारा एयरको विमानमा सवार गोरखाका गणेशनारायण श्रेष्ठसहित उनको परिवारका चार सदस्यको मृत्यु भएको हो।

जहाजमा गोरखा सहिदलखन गाउँपालिका–५ का गणेशनारायण श्रेष्ठ दम्पतीसहित उनीहरुका दुई छोरी रहेको पुष्टि भएको छ।

५२ वर्षका श्रेष्ठसँगै, उनकी श्रीमती ४८ वर्षकी रश्मी श्रेष्ठ, छोरीहरु २० वर्षकी रविना श्रेष्ठ र २३ वर्षकी रोजिना श्रेष्ठको मृत्यु भएको हो।

अध्ययनको शिलशिलामा अमेरिका गएका छोरीहरु नेपाल आएका बेला सपरिवार मुक्तिनाथ भ्रमणमा निस्केका थिए। मुक्तिनाथ दर्शनका लागि उनीहरु पोखराबाट जोमसोमका लागि उडेका थिए।

जहाज चढ्नुअघि उनीहरुले अमेरिकामा रहेका छोरासित सम्पर्क गरेका थिए। सोही आधारमा श्रेष्ठ परिवार उक्त जहाजमा रहेको पुष्टि भएको गाउँपालिकाका अध्यक्ष रमेशबाबु थापाले बताए।

जहाज बेपत्ता भएपछि गाउँपालिकाका अध्यक्ष थापा मगर, उपाध्यक्ष इन्दिरा तिवारी, वडाअध्यक्ष यमबहादुर राना, श्रेष्ठका आफन्त केशर श्रेष्ठ र स्थानीय विजय पुडासैनीको टोली पोखरा पुगेको थिए।

आइतबार बिहान १० बजेदेखि सम्पर्कविहीन भएको जहाज सोमबार बिहान मात्र दुर्घटनाग्रस्त अवस्थामा भेटिएको हो।