महानगर नेतृत्वका लागि गठबन्धनको मिल्यो कुरा !

काठमाडौं – सत्ता गठबन्धन दलबीच महानगर र उपमहानगरको उम्मेदवारका लागि करिब-करिब सहमति भएको छ । स्रोतका अनुसार सोमबार बसेको बैठकपछि राजनीतिक दलहरुले दलभित्र गरेको छलफलमा सहमतिको अन्तिम खाका बनिसकेको छ ।

जसअनुसार नेपाली कांगेसले काठमाडौं, ललितपुर र विराटनगर पाउने तय भएको छ भने नेकपा माओवादीले भरतपुर पाउने भएको छ । त्यस्तै जसपाले वीरगञ्ज महानगर प्रमुखमा उम्मेदवारी पाउने सहमति भइसकेको छ भने एकीकृत समाजवादीले भने पोखरामा दाबी गरेको छ ।

माधव नेपाल नेतृत्वको एकीकृत समाजवादीले पोखरामा दाबी गरे पनि सो महानगरमा नेपाली कांग्रेसले पनि बलियो दाबेदारी गरिरहेको छ । सामान्य अवस्थामा समाजवादीको खासै प्रभाव नरहेको पोखरामा दाबी गर्नु दाबीका लागि दाबी जस्तो मात्रै देखिएको छ । पोखरामा समाजवादीले दाबी गरेपछि कास्कीका कांग्रेस कार्यकर्तासँग कांग्रेस सभापति शेरबहादुर देउवाले भेट गर्ने भएका छन् । पोखरामा समाजवादीले नपाएमा विद्रोह गर्ने घोषणा गरेका जिल्ला अध्यक्षको अभिव्यक्तिले गठबन्धनमा समाजवादीप्रतिको दृष्टिकोणमा सोच्न बाध्य बनाउने अपेक्षा पनि जनमानसले गर्न थालेका छन् ।

गठबन्धनको शीर्ष नेतृत्वले समाजवादीलाई पोखरा महानगर दिएको खण्डमा कांग्रेस कार्यकर्ता र मतदाता भने बिच्किने अवस्था देखिएको छ ।

ललितपुर प्रमुख र उपप्रमुख दुवै पाउने कांग्रेसले अन्य ३ महानगरमा पनि उपमेयर पाउने सहमति भएको स्रोतले जनाएको छ । त्यस्तै काठमाडौंमा उपप्रमुखमा समाजवादीले दाबी गरेको छ भने विराटनगरमा जसपाको करिब–करिब निश्चित भइसकेको छ ।

११ उपमहानगरमध्ये कांग्रेसबाहेक अन्यले २/२ उपमहानगरमा दाबी गरेका छन् भने कांग्रेसले आफूले ६ वटा पाउनुपर्ने दाबी गरिरहेको छ । जसअनुसार कांग्रेसले धरान, कलैया, धनगढी, तुल्सीपुर, इटहरी र बुटवलमा दाबी गरेको छ । त्यस्तै माओवादी केन्द्रले घोराही र जितपुर सिमरामा दाबी गरेको छ । नेकपा एकीकृत समाजवादीले भने हेटौंडा, तुल्सीपुर र इटहरीमध्ये २ मा दाबी गरेको छ । भने जसपाले जनकपुर र नेपालगञ्जमा दाबी गरेको छ ।

यदि एकीकृत समाजवादीले पोखरा नछाडेको खण्डमा समाजवादीलाई अन्य कहिँ पनि नदिने सम्भावना रहेको पनि जनाइएको छ । यदि काठमाडौंको उपप्रमुख दाबी गरेको समाजवादीले पोखरा नछाडेको खण्डमा काठमाडौं पनि नदिने र अन्य कुनै स्थानमा पनि नदिने सोचमा गठबन्धन रहेको जनाइएको छ । र समाजवादीको प्रभाव रहेको मानिएको हेटाैंडा कांग्रेसले लिने सम्भावना रहेको छ ।

त्यस्तै माओवादी केन्द्र भने भरतपुरको मेयर मात्रै पाएको खण्डमा अन्यमा जो जो भए पनि सहमतिमा आउने देखिएको छ ।