गत माघ १ गतेदेखि सो कार्यक्रम बन्द गरेको अस्पतालले यही असार १५ गतेदेखि पुनः सेवा सुरु गरेको हो।

अस्पतालका कार्यकारी निर्देशक डा सुभाशप्रसाद आचार्यका अनुसार हाल बहिरङ्ग सेवा (ओपिडी)मा सो सेवा सञ्चालन गर्ने र केही दिनपछि अन्य सेवामा पनि विस्तार गरिनेछ।

स्वास्थ्य बिमा कार्यक्रममार्फत अस्पतालले उपलब्ध गराएको उपचारको भुक्तानी नभएपछि सेवा बन्द भएको थियो। उनका अनुसार अस्पतालले बिहान ७ः०० देखि ११ः०० बजे र दिउँसो १३ः०० बजेदेखि साढे १४ः०० बजेसम्म बिमा टिकट बिरामीलाई उपलब्ध गराइने छ।

केही दिन अघि मात्र बोर्डले अस्पताललाई स्वास्थ्य बिमाबाट उपचार गरेवापतको भुक्तानी उपलब्ध गराएको थियो।

अस्पतालले विसं २०७७ बाट नियमित रूपमा सञ्चालन गर्दै आएको स्वास्थ्य बिमा कार्यक्रममार्फत उपचार सेवा सञ्चालन गरेको थियो।

The post आजदेखि त्रिवि शिक्षण अस्पतालमा स्वास्थ्य बिमा कार्यक्रम पुनःसञ्चालन  appeared first on कागजपत्र.

बोर्डले असार ८ गते गरेको निर्णयअनुसार कुल २३ अर्ब ३३ करोड ६४ लाख ५४ हजार ४१९ रुपैयाँ ३५ पैसा बराबरको दाबी रकम भुक्तानी तथा पेश्की फर्छ्यौट गरिएको जनाएको छ ।

अर्थ मन्त्रालयबाट असार ४ गते निकासा भएको बजेटका आधारमा सम्बन्धित स्वास्थ्य संस्थाहरूको बैंक खातामा रकम पठाइएको बोर्डका लेखा उपसचिव पुष्पप्रसाद गुरागाईंले जानकारी दिएका छन् ।

बोर्डका अनुसार आर्थिक वर्ष २०८१-०८२ र २०८२-०८३ को गरी कुल २७ अर्ब ८१ करोड ७० लाखभन्दा बढी दाबी रकम रुजु गरिएको थियो । यसमध्ये अघिल्लो वर्ष स्वास्थ्य संस्थाहरूलाई दिइएको ४ अर्ब ३६ करोड ६९ लाखभन्दा बढी पेश्की रकम खर्चमा समायोजन गरी फर्छ्यौट गरिएको छ ।

दाबी भुक्तानी गर्दा स्वीकृत रकमको २ प्रतिशत रकम कट्टा गरी बाँकी रकम सम्बन्धित संस्थाहरूलाई पठाइएको बोर्डले जनाएको छ । यस भुक्तानीसँगै गत आर्थिक वर्ष २०८१-०८२ का सबै स्वीकृत दाबी तथा चालु आर्थिक वर्ष २०८२-०८३ को साउनदेखि मंसिर मसान्तसम्मका स्वीकृत दाबी रकमको भुक्तानी सम्पन्न भएको बोर्डले जनाएको छ ।

भुक्तानी प्राप्त गर्ने प्रमुख अस्पतालहरूमध्ये भरतपुर अस्पतालले सबैभन्दा बढी ७ करोड ११ लाख प्राप्त गरेको छ । त्यसपछि पश्चिमाञ्चल क्षेत्रीय अस्पताल, पोखराले ५ करोड ४७ लाख, लुम्बिनी प्रादेशिक अस्पताल, बुटवलले ५ करोड ३ लाख र बाकुलहर रत्ननगर अस्पताल, चितवनले ४ करोड ९७ लाख प्राप्त गरेका छन् ।

त्यस्तै वीर अस्पतालले ४ करोड ४८ लाख, नेपाल–कोरिया मैत्री नगरपालिका अस्पतालले ४ करोड २१ लाख, त्रिवि शिक्षण अस्पतालले ४ करोड ४ लाख, दमक अस्पतालले ३ करोड ९६ लाख, कोशी अस्पतालले ३ करोड ३४ लाख र भेरी अस्पतालले २ करोड २ लाख रुपैयाँ प्राप्त गरेका छन् ।

स्वास्थ्य बीमा बोर्डले सार्वजनिक गरेको यो भुक्तानी विवरणले स्वास्थ्य बीमा कार्यक्रमअन्तर्गत सेवा दिइरहेका अस्पतालहरूको आर्थिक व्यवस्थापनमा राहत पुग्ने र बीमित नागरिकलाई सेवा प्रवाह थप प्रभावकारी बनाउन सहयोग पुग्ने अपेक्षा गरिएको छ ।

The post स्वास्थ्य बीमा बोर्डद्वारा अस्पतालहरूलाई २३ अर्ब बढी रकम भुक्तानी appeared first on कागजपत्र.

विगत छ महिनादेखि सिटी स्क्यान मेसिन बिग्रिएर सेवा बन्द भएको अस्पालका निमित्त कार्यकारी निर्देशक डा रविप्रकाश शर्माले जानकारी दिए ।

‘सिटी स्क्यान मेसिन बिग्रिएर बिरामीलाई धेरै नै समस्या भएको छ’, उनले भने, बिरामीलाई सिटी स्क्यानका लागि अन्यत्र पठाउनुपरेको छ ।’ अस्पतालमा दैनिक ६०० भन्दा बढी बिरामी उपचारका लागि आउने गरेका छन् ।

The post निजामती अस्पतालमा ६ महिनादेखि ‘सिटी स्क्यान’ सेवा ठप्प appeared first on कागजपत्र.

विभागका अनुसार नवीकरणको म्याद समाप्त भएका र निर्धारित अवधिभित्र नवीकरण नगरिएका औषधि पसलहरूको दर्ता प्रमाणपत्र (अनुसूची–९) स्वतः रद्द भएको हो।

यो व्यवस्था औषधि ऐन, २०३५ को दफा ११ मा गरिएको संशोधन तथा सोही दफाको उपदफा (५) बमोजिम लागू भएको विभागले जनाएको छ। संशोधित व्यवस्थाअनुसार औषधि उत्पादन अनुज्ञापत्र, सिफारिसपत्र तथा प्रमाणपत्रको अवधि र नवीकरणसम्बन्धी प्रावधान कडाइका साथ कार्यान्वयन गरिएको छ।

विभागले जेठ २८ गतेसम्म नवीकरण म्याद समाप्त भई स्वतः रद्द भएका औषधि पसलहरूको सूचीसमेत सार्वजनिक गरेको छ। कानुनी व्यवस्थाअनुसार खारेजीसम्बन्धी जानकारी सम्बन्धित व्यक्ति, संस्था तथा सरोकारवालालाई उपलब्ध गराउनुपर्ने भएकाले सूचना प्रकाशन गरिएको विभागको भनाइ छ।

दर्ता प्रमाणपत्र रद्द भएका पसलहरूले अब कानुनी रूपमा औषधि पसल सञ्चालन गर्न नपाउने विभागले स्पष्ट पारेको छ।

यसैबीच, विभागले सबै औषधि पसल सञ्चालकलाई आफ्नो प्रमाणपत्रको अवस्था यकिन गरी आवश्यक कानुनी प्रक्रिया पूरा गर्न आग्रह गरेको छ। साथै औषधि बिक्री–वितरण गर्दा प्रचलित कानुनी व्यवस्था तथा विभागीय निर्देशनको पूर्ण पालना गर्न पनि निर्देशन दिएको छ।

विभागले कानुनी मापदण्ड पूरा नगरी औषधि व्यवसाय सञ्चालन नगर्न र जनस्वास्थ्यसँग प्रत्यक्ष सरोकार राख्ने क्षेत्रमा लापरबाही नगर्न सम्बन्धित सबैलाई सचेत गराएको छ।

The post ५,३०२ औषधि पसलको दर्ता प्रमाणपत्र खारेज appeared first on कागजपत्र.

चिकित्सकहरूका अनुसार औषधि अभावको मुख्य कारण उत्पादनमा प्रयोग हुने सक्रिय कच्चा पदार्थ (एपीआई) को विश्वव्यापी अभाव, त्यसको मूल्यवृद्धि तथा इन्धन महँगिँदा उत्पादन र ढुवानी लागत बढ्नु हो। तर लागतअनुसार नेपालमा बिक्री मूल्य समायोजन हुन नसक्दा आयातकर्ताले पर्याप्त मात्रामा औषधि ल्याउन नसकेको उनीहरूको भनाइ छ।

औषधि व्यवस्था विभागले देशभरका ११ स्वास्थ्य संस्था तथा मेडिकलमार्फत अभाव भएका औषधि उपलब्ध गराउने व्यवस्था गरे पनि मागअनुसार आपूर्ति हुन सकेको छैन। चितवनका लागि भरतपुरको राज ड्रग प्रालिलाई जिम्मेवारी दिइएको छ। त्यहाँ कार्बोप्लाटिन उपलब्ध भए पनि मागको तुलनामा निकै कम रहेको प्रालिका सञ्चालक राजीव थापाले बताए।

माडी नगरपालिका–३ धोवाहाका एकला महतो बुहारी मनिषाको उपचारका लागि भरतपुर आए । गएको माघदेखि किमोथेरापी सुरु गरेकी २४ वर्षीया मनिषाको ११औँ चरणको उपचारका लागि आवश्यक औषधि नपाएपछि उनीहरू विभिन्न ठाउँ धाउन बाध्य भए। ‘सोमबार नै आएँ, तर औषधि पाइएन। धेरै ठाउँ खोजेपछि बल्ल जुटाएर उपचार गर्न पाएँ। अर्को पटक पाइन्छ कि पाइँदैन भन्ने चिन्ता लागिरहेको छ,’ एकलाले भने।

महोत्तरीको रामगोपालपुरकी पुनम मण्डलले पनि आमा रिङ्कुकुमारीको उपचारका क्रममा औषधि अभावका कारण चार दिनसम्म भरतपुरमा बस्नुपरेको बताइन्। ‘दोस्रो चरणमै एउटा औषधि पाइएन। अहिले पनि धेरै खोजेपछि मात्र भेटियो,’ उनले भनिन्।

पर्साको छिपहरमाई गाउँपालिका–२ का ओमप्रकाश कुमारले चौथो पटकको किमोथेरापीका लागि तीन दिनसम्म औषधि खोज्नुपरेको सुनाए। ‘रोगसँग लड्नुपरेको छ, औषधि पाउन झन् ठूलो संघर्ष गर्नुपरेको छ,’ उनले भने।

देशकै प्रमुख क्यान्सर उपचार केन्द्र मानिने बीपी कोइराला मेमोरियल क्यान्सर अस्पतालमा देशभरका साथै सीमावर्ती भारतीय क्षेत्रबाट समेत बिरामी आउने गर्छन्। तर पछिल्लो एक महिनादेखि कार्बोप्लाटिन र सिसप्लाटिनको अभावले उपचार व्यवस्थापन नै प्रभावित भएको चिकित्सकहरू बताउँछन्।

मेडिकल अन्कोलोजी विभागका प्रमुख डा. गुरुशरण शाहका अनुसार किमोथेरापी गर्ने १० बिरामीमध्ये सातदेखि आठ जनासम्मलाई यी दुई औषधि आवश्यक पर्छ। अस्पतालमा हरेक साता करिब चार सय जनाले किमोथेरापी गराउने गरे पनि अहिले उपलब्ध औषधिले आधा बिरामीलाई मात्रै पुग्ने अवस्था छ। ‘सरकारले केही अस्थायी व्यवस्था गरेको छ। तर बजारमा मागको आधाजति मात्रै औषधि उपलब्ध छ। एक हिसाबले कार्बोप्लाटिन र सिसप्लाटिनको हाहाकार नै भएको छ,’ डा. शाहले भने।

उनका अनुसार केही बिरामीले अनधिकृत रूपमा भित्रिएका औषधिसमेत किन्न बाध्य भएको सूचना आउने गरेको छ। ‘किमोथेरापीका औषधि २५ डिग्री सेल्सियसभन्दा कम तापक्रममा सुरक्षित राख्नुपर्छ। झोलामा बोकेर ल्याइएका औषधिको गुणस्तरमा जोखिम हुन सक्छ,’ उनले भने। राज ड्रग प्रालिका सञ्चालक राजीव थापाका अनुसार बुधबार ४५० मिलिग्रामका २० वटा र १५० मिलिग्रामका २० वटा कार्बोप्लाटिन प्राप्त भएको थियो। ‘४५० मिलिग्रामका सबै सकिए। दिनमै कम्तीमा ४० वटा माग हुन्छ,’ उनले भने।

डा. शाहका अनुसार कार्बोप्लाटिन र सिसप्लाटिन उत्पादनमा प्रयोग हुने एपीआईको अभाव र मूल्यवृद्धिका कारण विश्वभर उत्पादन प्रभावित भएको छ। इन्धन महँगिएपछि ढुवानी र उत्पादन लागतसमेत बढेको छ। तर सोहीअनुसार नेपालमा बिक्री मूल्य समायोजन नहुँदा आयातकर्ताले पर्याप्त परिमाणमा औषधि ल्याउन नसकेको उनले बताए। ‘पहिलेदेखि नै यसको अभाव हुने संकेत थियो। यो यस्तो औषधि हो, जसको प्रभावकारी विकल्प छैन। विकल्प खोज्दा बिरामीको उपचार नै अपुरो हुन सक्छ,’ उनले भने।

The post किमोथेरापीका अत्यावश्यक औषधि कार्बोप्लाटिन र सिसप्लाटिनको अभाव, बिरामीलाई सास्ती appeared first on कागजपत्र.

न्याम्सका सहायक डिन प्रा.डा. विकासविक्रम सिंह अधिकारीले सोमबार परिपत्र जारी गर्दै २४ घण्टाको ड्युटी पूरा गरेका आवासीय चिकित्सकलाई बिहानको राउण्ड सकेपछि अनिवार्य रूपमा बिदा दिन निर्देशन दिएका हुन्।

यसअघि न्याम्समा आवासीय चिकित्सकहरूले लगातार ३६ घण्टासम्म ड्युटी गर्नुपर्ने अवस्था रहेको थियो। लामो कार्यघण्टा र अत्यधिक कार्यबोझका कारण उनीहरू शारीरिक तथा मानसिक दबाबमा पर्ने गरेका थिए।

नयाँ व्यवस्थासँगै रेजिडेन्ट चिकित्सकमाथिको कार्यबोझ केही हदसम्म कम हुने अपेक्षा गरिएको छ। परिपत्रमा भनिएको छ, “यस प्रतिष्ठानमा अध्ययनरत रेजिडेन्ट चिकित्सकहरूको २४ घण्टा ड्युटीपश्चात बिहानको राउण्ड सकिएपछि बिदा गरिदिनुहुन जानकारी गराइन्छ।” उक्त निर्देशन एमडी/एमएस/एमडिएस तथा डिएम/एमसीएच कार्यक्रमका संयोजकहरूलाई पठाइएको छ।

यसअघि नेपाल मेडिकल काउन्सिलले पनि आवासीय चिकित्सकहरू अत्यधिक कार्यबोझमा रहेको निष्कर्ष निकाल्दै मेडिकल कलेज, प्रतिष्ठान र विश्वविद्यालयहरूलाई ड्युटीपश्चात पर्याप्त आरामको व्यवस्था गर्न निर्देशन दिएको थियो।

न्याम्सको यो निर्णयलाई आवासीय चिकित्सकहरूको कार्य अवस्था सुधारतर्फको महत्वपूर्ण कदमका रूपमा हेरिएको छ।

The post वीर अस्पतालमा २४ घण्टाकाे ड्युटीपछि रेजिडेन्ट चिकित्सकलाई अनिवार्य बिदा appeared first on कागजपत्र.

नगरसभाको १९औँ अधिवेशनको पहिलो बैठकमा कार्यबाहक मेयर सुनिता डंगोलले प्रस्तुत गरेको नीति तथा कार्यक्रममा निःशुल्क एम्बुलेन्स सेवालाई निरन्तरता दिँदै महानगर क्षेत्रभित्र छिटो र प्रभावकारी आपत्कालीन स्वास्थ्य सेवा पुर्‍याउन बाइक एम्बुलेन्स सञ्चालन गर्ने योजना समावेश गरिएको हो।

महानगरका अनुसार काठमाडौंका धेरै क्षेत्रमा सडक साँघुरा हुनुका साथै ट्राफिक जामको समस्या बढ्दो क्रममा रहेकाले परम्परागत एम्बुलेन्स समयमै घटनास्थल पुग्न कठिन हुने गरेको छ। यस्ता अवस्थालाई मध्यनजर गर्दै मोटरसाइकलमार्फत प्राथमिक उद्धार तथा स्वास्थ्य सेवा उपलब्ध गराउने उद्देश्यले बाइक एम्बुलेन्स अवधारणा अघि सारिएको हो।

नीति तथा कार्यक्रममा शहरी स्वास्थ्य प्रवर्द्धन केन्द्रहरूको क्षमता अभिवृद्धि गरी आधुनिक, समयसापेक्ष र प्रविधिमैत्री स्वास्थ्य सेवा विस्तार गर्ने प्रतिबद्धता पनि व्यक्त गरिएको छ। स्थानीय तहबाटै प्रभावकारी स्वास्थ्य सेवा प्रवाह गर्ने उद्देश्यका साथ स्वास्थ्य संस्थाहरूलाई थप सुदृढ बनाइने जनाइएको छ।

महानगरले स्वस्थ जीवनशैली प्रवर्द्धनलाई पनि प्राथमिकतामा राखेको छ। यसअन्तर्गत आयुर्वेद, वैकल्पिक चिकित्सा, योग, व्यायाम, प्राणायाम तथा ध्यानसम्बन्धी कार्यक्रम सञ्चालन गरिने भएको छ। नागरिकको शारीरिक स्वास्थ्य मात्र नभई मानसिक र आध्यात्मिक स्वास्थ्य सुधारमा समेत ध्यान केन्द्रित गरिने कार्यबाहक मेयर डंगोलले बताइन्।

बदलिँदो जीवनशैलीसँगै मानसिक स्वास्थ्य समस्या बढ्दै गएको निष्कर्ष निकाल्दै महानगरले मनोपरामर्श सेवा र विशेष ‘कल सेन्टर’ सञ्चालनमा ल्याउने घोषणा गरेको छ। मानसिक तनाव, चिन्ता, अवसादलगायत समस्याबाट पीडित नागरिकलाई सहज पहुँचमा परामर्श सेवा उपलब्ध गराउने उद्देश्य राखिएको छ।

त्यसैगरी मिर्गौला रोगीहरूको उपचारलाई सहज बनाउन डायलाइसिस सेवाको विस्तार तथा सुदृढीकरण गरिने भएको छ। उपचार खर्च र सेवाको पहुँचका कारण समस्या भोगिरहेका बिरामीलाई लक्षित गरी थप सुविधा विस्तार गरिने नीति तथा कार्यक्रममा उल्लेख गरिएको छ।

महानगरले मातृशिशु तथा प्रजनन स्वास्थ्य सेवालाई पनि विशेष प्राथमिकता दिएको छ। यसअन्तर्गत विभिन्न लक्षित कार्यक्रम सञ्चालन गरिनुका साथै सार्वजनिक स्थानहरूमा स्तनपान कक्ष स्थापना तथा व्यवस्थापनलाई प्राथमिकताका साथ अघि बढाइने भएको छ। यसले स्तनपान गराइरहेका आमाहरूलाई सार्वजनिक स्थलमा सहज वातावरण उपलब्ध गराउने अपेक्षा गरिएको छ।

स्वास्थ्य सेवाको गुणस्तर सुधारका लागि महानगर क्षेत्रभित्र सञ्चालित अस्पताल तथा स्वास्थ्य संस्थाहरूको नियमित अनुगमन र नियमन गरिने नीति लिइएको छ। सेवा प्रवाहमा गुणस्तर कायम गर्न तथा नागरिकले प्रभावकारी स्वास्थ्य सेवा प्राप्त गर्न सकून् भन्ने उद्देश्यले अनुगमन प्रणालीलाई थप कडा बनाइने महानगरको योजना छ।

यस्तै, विपन्न तथा असहाय नागरिकका लागि अस्पतालहरूले उपलब्ध गराउनुपर्ने १० प्रतिशत निःशुल्क उपचार सेवाको व्यवस्थालाई कडाइका साथ कार्यान्वयन गरिने उल्लेख गरिएको छ। महानगरले यस व्यवस्थाको प्रभावकारी कार्यान्वयन सुनिश्चित गर्न निगरानी बढाउने जनाएको छ।

नीति तथा कार्यक्रमको अर्को महत्वपूर्ण घोषणा महानगर अस्पताल निर्माण पनि हो। गुणस्तरीय तथा विशिष्टीकृत स्वास्थ्य सेवा नागरिकको पहुँचमा पुर्‍याउने लक्ष्यसहित महानगरस्तरीय अस्पताल स्थापना गर्ने योजना सार्वजनिक गरिएको छ।

ज्येष्ठ नागरिकलाई लक्षित गरी नियमित स्वास्थ्य परीक्षण, स्वास्थ्य संस्थासँगको सहकार्यमा विशेष स्वास्थ्य सेवा तथा आकस्मिक स्वास्थ्य शिविर सञ्चालन गरिने कार्यक्रम पनि नीति तथा कार्यक्रममा समेटिएको छ।

महानगरले सार्वजनिक गरेका यी कार्यक्रमहरू कार्यान्वयनमा आए काठमाडौंवासीले थप सहज, पहुँचयोग्य, गुणस्तरीय तथा प्रभावकारी स्वास्थ्य सेवा प्राप्त गर्ने अपेक्षा गरिएको छ। विशेषगरी आपत्कालीन उद्धार, मानसिक स्वास्थ्य, मातृशिशु सेवा, दीर्घरोग उपचार तथा ज्येष्ठ नागरिक स्वास्थ्य सेवामा उल्लेखनीय सुधार ल्याउने लक्ष्य महानगरले लिएको छ।

The post काठमाडौंमा बाइक एम्बुलेन्सदेखि महानगर अस्पतालसम्म appeared first on कागजपत्र.

श्रम अधिकार, पारिश्रमिक, बिदा, मानसिक स्वास्थ्य तथा चिकित्सा शिक्षासँग सम्बन्धित विषय समेट्दै उनीहरूले ७ बुँदे माग सार्वजनिक गरेका हुन्। प्रदर्शनमा सहभागी चिकित्सकहरूले प्रशिक्षणका क्रममा आफूहरू लामो समयसम्म काम गर्न बाध्य भएको, श्रम ऐनले सुनिश्चित गरेका सेवा–सुविधाबाट वञ्चित रहनुपरेको तथा अध्ययन र प्रशिक्षण अवधिमा विभिन्न कठिनाइ भोग्दै आएको गुनासो गरेका छन्।

उनीहरूले चिकित्सकमाथि भइरहेको श्रम शोषण अन्त्य गरी सुरक्षित, सम्मानजनक र व्यवस्थित कार्य वातावरण सुनिश्चित गर्न सरकारसँग माग गरेका छन्। साथै, चालु आर्थिक वर्षको बजेटमार्फत घोषणा गरिएको तलब वृद्धिलाई तत्काल कार्यान्वयन गर्नुपर्ने उनीहरूको प्रमुख माग रहेको छ।

प्रदर्शनकारी चिकित्सकहरूले आवासीय चिकित्सकलाई अधिकृत आठौँ तहसरहको तलब आगामी साउन महिनादेखि उपलब्ध गराउनुपर्ने बताएका छन्। त्यस्तै, सातामा ४८ घण्टाभन्दा बढी काम गराइए श्रम ऐनअनुसार अतिरिक्त समयको भत्ता (ओभरटाइम) उपलब्ध गराउनुपर्ने माग पनि उनीहरूले अघि सारेका छन्।

चिकित्सकहरूको भनाइमा प्रशिक्षण र सेवा दुवै जिम्मेवारी निर्वाह गरिरहेका आवासीय तथा युवा चिकित्सकले उचित पारिश्रमिक, पर्याप्त विश्राम, बिदा तथा मानसिक स्वास्थ्यसम्बन्धी सहुलियत नपाउँदा सेवा प्रवाहसमेत प्रभावित हुने अवस्था सिर्जना भएको छ। त्यसैले चिकित्सकको श्रमको उचित मूल्यांकन गर्दै उनीहरूका माग तत्काल सम्बोधन गर्न सरकारको ध्यानाकर्षण गराइएको छ।

The post ‘जेनजी डाक्टरलाई न्याय दे’ भन्दै युवा चिकित्सक माइतीघरमा प्रदर्शन appeared first on कागजपत्र.

भारत लगायतका देशमा रोबोटिक सर्जरी अर्थात् रोबोटमार्फत गरिने जटिल शल्यक्रिया सफलपछि नेपालको सरकारी अस्पतालमा पहिलो पटक रोबोटिक सर्जरी सुरु गर्न लागिएको हो ।

विश्वको जुनसुकै देशको एउटा कोठामा बसेर चिकित्सकले अर्को देशको अस्पतालका बिरामीको शल्यक्रियामार्फत उपचार गर्ने प्रविधि रोबोटिक सर्जरी हो । निजी क्षेत्रका अस्पतालले त्यस खाले उपचार सेवा यसअघि नै सुरु गरिए तापनि भक्तपुर अस्पतालले सञ्चालन गर्न लागेको रोबोटिक सर्जरी अत्याधुनिक रहेको जनाइएको छ ।

बागमती प्रदेशका स्वास्थ्यमन्त्री किरण थापा मगरले सरकारी अस्पतालमा पहिलो पटक भक्तपुर अस्पतालमा रोबोटिक सर्जरी सेवा सुरु गर्ने प्रक्रिया प्रदेश सरकारले सुरु गरेको बताए । उनले भने, “अत्याधुनिक उपकरण र प्रविधिको प्रयोग गरी नेपालमा पहिलो पटक सरकारी अस्पतालमा रोबोटिक सर्जरी सञ्चालन गर्ने जमर्को बागमती प्रदेश सरकारले गरेको छ, त्यसका लागि बोलपत्र आह्वान भइसकेको छ । यसबाट बिरामीलाई सहज र सुलभ रुपमा उपचार सेवा दिन सक्छौँ ।”

बागमती प्रदेश सरकारको मुख्यमन्त्री इन्द्र बानियाँ र स्वास्थ्यमन्त्री किरण थापाले सरकारी अस्पतालमा गुणस्तरीय प्रविधि भित्र्याएर सर्वसुलभ रुपमा उपचार गर्ने लक्ष्यका साथ बागमती प्रदेश सरकारले रोबोटिक सर्जरी ल्याउने निर्णय गरेको हो ।

स्वास्थ्यमन्त्री थापाले विशेषज्ञ चिकित्सकले भित्तामा जडित ठूलो स्क्रिन हेर्दै रोबोट प्रविधिमार्फत शल्यक्रिया गर्ने भएकाले नेपालको स्वास्थ्य क्षेत्रका लागि नयाँ युगको सुरुआत भएको बताए । शल्यक्रियामा रोबोटिक प्रविधिको प्रयोगले चिकित्सक र बिरामी दुवैका लागि फाइदा र सहज हुने भक्तपुर अस्पतालका रोबोटिक विशेषज्ञ एवं कन्सल्टेन्ट सर्जन डा रन्जिसकुमार पहाडी क्षेत्रीले जानकारी दिए ।

नेपालको चिकित्सा क्षेत्रमा झण्डै सवा शताब्दी लामो इतिहास बोकेको भक्तपुर अस्पतालले विश्वसनीय स्वास्थ्य सेवा पुर्याउँदै आएको छ । पछिल्ला वर्षहरुमा सरकारी अस्पतालमध्ये लगातार उत्कृष्ट स्थान हासिल गर्दै आएको अस्पतालले समयको माग र नयाँ प्रविधिसँगै आफ्नो सेवालाई अझ आधुनिक बनाउँदै लगेको छ ।

उनले भक्तपुर अस्पताललाई रोबोटिक सर्जरी सेवासँगै यसको तालिम केन्द्रका रुपमा विकास गरिने बताए । भक्तपुर अस्तालले त्यो सेवा सुरु गर्न आवश्यक जनशक्तिका समेत सञ्चालन गर्ने जनाएको छ । डा. पहारीले रोबोटिक शल्यक्रियाको सुरुआतले भक्तपुर अस्पताल अब परम्परागत उपचार पद्धतिबाट माथि उठेर नेपालकै एउटा उत्कृष्ट उपचार र सिकाइ केन्द्रको रुपमा रहन पुगेको दाबी गरे ।

सरकारी अस्पतालमा भित्रिएको यस प्रविधिबाट गरिब तथा विपन्न वर्गका बिरामीले समेत संसारकै उत्कृष्ट र आधुनिक प्रविधिबाट सुलभ उपचार पाउने अस्पतालका निमित्त निर्देशक डा त्रिभुवनचन्द्र झाले बताए ।

रोबोटिक शल्यक्रिया के हो ?

रोबोटिक शल्यक्रिया मेसिन वा रोबोट आफैँले शल्यक्रिया गर्ने नभई रोबोटलाई सर्जन चिकित्सकले नियन्त्रणमा राखेर गरिने शल्यक्रिया भएका डा. पहारी बताउँछन् । उनका अनुसार, चिकित्सकले उपकरण चलाउँदा रोबोटका हात बिरामीको पेटभित्र निकै मसिनो र सटिक तरिकाले चल्ने भएकाले त्यसका माध्यमबाट शल्यक्रिया गरिन्छ ।

भक्तपुर अस्पतालमा त्यस प्रविधिको प्रयोग गरी विशेषगरी पेटको मांसपेशी नै सिलाउन र मिलाउनुपर्ने जटिल खालका हर्निया, पेट र आन्द्राको ट्युमर, पत्थरी, पाठेघरको ट्युमर, मिर्गौला र प्रोस्टेटसम्बन्धी जटिल समस्या तथा कार्डियाक ब्यारियाट्रिक र बाल चिकित्सा शल्यक्रिया सञ्चालन गर्ने लक्ष्य छ ।

कम दुखाइ र न्यून खर्चमा हुने यो प्रविधिले पेटमा ठूलो प्वाल नभई स–साना प्वाल पारेर शल्यक्रिया गरिनेछ । घाउ सानो हुने भएकाले तुलनात्मकरुपमा बिरामीलाई दुखाइ कम हुने, शल्यक्रियापछि थोरै समयमै हिँडडुल गर्न र घर फर्कन सहज हुनेछ । प्रविधिको प्रयोबाट हुने उपचार बिरामीको खर्च र अस्पतालको बसाई निकै कम हुने विश्वास गरिएको छ ।

नयाँ प्रविधिलाई अझ व्यवस्थित र सुरक्षित बनाउन रोबोटिक रजिस्ट्री विवरणलाई व्यवस्थित तुल्याइने अस्पतालले जनाएको छ । प्रविधिलाई नेपाली बिरामीमा अझ प्रभावकारी कसरी बनाउन सकिन्छ भनी अस्पतालका सर्जनले नियमित रूपमा अनुसन्धान गर्ने छन् । त्यससँगै अस्पताललाई तालिमसहित रोबोटिक शल्यक्रिया सिकाउने नेपालकै उत्कृष्ट सेन्टर अफ एक्सीलेन्स बनाउने तयारी गरिएको छ ।

The post भक्तपुर अस्पतालले सुरु गर्दै ‘रोबोटिक’ शल्यक्रिया appeared first on कागजपत्र.

प्राप्त जानकारीअनुसार जेठ २३ गते हेगौलीका १०५ घरधुरीका स्थानीयवासीले बंगुर काटेर सामूहिक भोज खाएका थिए। भोजपछि वर्ष ४४ की रामकुमारी महतोसहित १६ जनामा ज्वरो आउने, बान्ता हुने तथा पखाला लाग्ने समस्या देखिएको हो।

स्वास्थ्य समस्या देखिएपछि स्थानीय प्रहरीको सहयोगमा बिरामीहरूलाई मध्यविन्दु प्रादेशिक अस्पताल, डण्डामा लगिएको छ। अस्पतालमा उनीहरूको उपचार भइरहेको जनाइएको छ।

प्रारम्भिक रूपमा खाद्यजन्य संक्रमण वा विषाक्तताको आशंका गरिए पनि बिरामी हुने कारणबारे यकिन हुन बाँकी रहेको छ। स्वास्थ्यकर्मीहरूले बिरामीहरूको स्वास्थ्य अवस्था निगरानीमा राखेर उपचार गरिरहेका छन्।

घटनाबारे थप अनुसन्धान तथा स्वास्थ्य परीक्षणको काम जारी रहेको सम्बन्धित निकायले जनाएको छ।

The post नवलपरासीमा बंगुरको मासु खाएपछि १६ जना बिरामी appeared first on कागजपत्र.

नेपाल मेडिकल काउन्सिलले गरेको अनुगमनका क्रममा आवश्यक अनुमति बिना अस्पताल सञ्चालनमा रहेको भेटिएपछि सिलबन्दी गरी बन्द गरिएको काउन्सिलका निमित्त रजिष्ट्रार डा. दीपेन्द्र पाण्डेले जानकारी दिए।

उनका अनुसार अनुमति बिना सञ्चालनमा रहेको उक्त संस्थाका सञ्चालकमाथि कारबाहीका लागि जिल्ला प्रशासन कार्यालय काठमाडौं र जिल्ला प्रहरी परिसरमा पत्राचार गरिएको छ।

काउन्सिलले आवश्यक अनुमति र क्लिनिकल मापदण्ड पूरा नगरी चिकित्सा अभ्यासमा संलग्न रहेको पाइएपछि तीन चिनियाँ नागरिकको चिकित्सक अभ्यास अस्थायी दर्ता तत्कालका लागि निलम्बन गरेको छ।

त्यसैगरी, उक्त संस्थाको बोर्डमा नाम राखी आचारसंहिता उल्लङ्घन गरेको आशंकामा संलग्न नेपाली चिकित्सकलाई पनि केही दिनभित्र लिखित स्पष्टीकरण पेस गर्न निर्देशन दिइएको डा. पाण्डेले बताए।

काउन्सिलले स्वास्थ्य सेवामा मापदण्ड पालना र कानुनी प्रक्रियाको कडाइका साथ अनुगमन जारी रहने जनाएको छ।

The post बालुवाटारको ‘मारिया अस्पताल’ गैरकानुनी, सञ्चालकमाथि अनुसन्धान सिफारिस appeared first on कागजपत्र.

काउन्सिलले चिकित्सकहरूका लागि आठ बुँदे आचारसंहिता सार्वजनिक गर्दै सामाजिक सञ्जाल तथा विद्युतीय माध्यममा स्वास्थ्यसम्बन्धी सामग्री प्रकाशन गर्दा व्यावसायिक मर्यादा र वैज्ञानिक प्रमाणको पालना गर्न निर्देशन दिएको हो।

नयाँ व्यवस्थाअनुसार चिकित्सकले नेपाल मेडिकल काउन्सिलमा दर्ता भएका उपाधि र योग्यताबाहेक अन्य उपाधि प्रयोग गर्न पाउने छैनन्। औपचारिक रूपमा प्राप्त विशेषज्ञता वा शैक्षिक योग्यताभन्दा बाहिर गएर व्यक्तिगत प्रचारप्रसार गर्न पनि रोक लगाइएको छ।

काउन्सिलले सामाजिक सञ्जालमा राखिने सामग्री तथ्यपरक, सान्दर्भिक र वैज्ञानिक आधारमा प्रमाणित हुनुपर्ने स्पष्ट पारेको छ। उपचार वा रोगसम्बन्धी जानकारी दिँदा वैज्ञानिक रूपमा स्थापित तथ्य मात्र प्रस्तुत गर्नुपर्नेछ भने अप्रमाणित वा आफूखुशी विकसित गरिएको उपचार विधिको प्रचार गर्न नपाइने व्यवस्था गरिएको छ।

त्यस्तै, कुनै बिरामीको रोग वा स्वास्थ्य अवस्थासम्बन्धी जानकारी सार्वजनिक गर्नुअघि सम्बन्धित व्यक्तिको स्वीकृति अनिवार्य रूपमा लिनुपर्नेछ।

आचारसंहिताअनुसार चिकित्सकले सामाजिक सञ्जालमार्फत दिएका सुझाव, सल्लाह वा अभिव्यक्तिको लिखित अभिलेख सुरक्षित राख्नुपर्नेछ। साथै, कुनै रोगको निदान वा उपचारका लागि प्रत्यक्ष परीक्षण आवश्यक देखिएमा बिरामीको भौतिक जाँच नगरी उपचारसम्बन्धी सुझाव दिन नहुने उल्लेख गरिएको छ।

काउन्सिलले अन्य व्यक्ति वा संस्थाका विचार तथा कार्यप्रति आलोचना गर्दा पनि तथ्यमा आधारित हुनुपर्ने र अपमानजनक वा मर्यादाविपरीत शब्द प्रयोग गर्न नपाइने व्यवस्था गरेको छ।

The post सामाजिक सञ्जालबाट उपचार र सल्लाह बढेपछि चिकित्सकका लागि आचारसंहिता जारी appeared first on कागजपत्र.