विवादको छाँयामा विज्ञानराज शर्मा: गोर्खाली कनेक्सनदेखि अख्तियार प्रमुखसम्मको दौड

काठमाडौं – तीन दशकभन्दा बढी प्रहरी संगठनमा बिताएका पूर्व एआईजी विज्ञानराज शर्मा फेरि एकपटक शक्तिको केन्द्रतिर उन्मुख देखिएका छन्। तर, उनको यो उकासो केवल प्रशासनिक अनुभवको आधारमा होइन—पुराना विवाद, शंकास्पद सम्बन्ध र पछिल्लो राजनीतिक चलखेलको संगमका रूपमा उठेको छ।

अहिले काठमाडौंका राजनीतिक गल्लीहरूमा एउटा कुरा तीव्र रूपमा घुमिरहेको छ—शर्मा अख्तियार दुरुपयोग अनुसन्धान आयोगको प्रमुख बन्ने दाउमा छन्, र त्यसका लागि उनी नयाँ शक्ति केन्द्रहरू, विशेषतः रवि लामिछाने र बालेन शाहतर्फ ‘लाइन मिलाउने’ प्रयासमा सक्रिय छन्। तर, प्रश्न यहाँबाट सुरु हुन्छ—के यति विवादास्पद विगत बोकेको व्यक्ति अख्तियारजस्तो संवेदनशील निकायको नेतृत्वका लागि योग्य हुन सक्छ?

‘गोर्खाली कनेक्सन’ : पुरानो छायाँ, नयाँ प्रश्न

प्रहरी वृत्तमै वर्षौँदेखि गुञ्जिँदै आएको आरोप हो-शर्माको सम्बन्ध कुख्यात गुण्डा नाइके राजु गोर्खालीसँग। एसएसपी हुँदा करिब १० करोड रुपैयाँको चेक बाउन्स मुद्दामा फरार रहेका गोर्खालीलाई आफ्नै गाडीमा राखेर हिँडिरहेको अवस्थामा प्रहरी नियन्त्रणमा परेको घटना अझै सेलाएको छैन।

त्यतिबेला पदको प्रभाव देखाएर ‘मैले चिनेकै मान्छे हो’ भन्दै जोगाउने प्रयास गरेको आरोप पनि जोडिन्छ। स्रोतहरू भन्छन्-सम्बन्ध त्यत्तिकै टुंगिएको होइन, पछिल्ला दिनमा समेत उनीहरूबीचको नजिकिन जारी रहेको चर्चा छ। यदि यो सत्यको नजिक छ भने, प्रश्न गम्भीर हुन्छ-गुन्डा नेटवर्कसँग जोडिएको छायाँ बोकेको व्यक्ति भ्रष्टाचार नियन्त्रण गर्ने संस्थाको नेतृत्व कसरी गर्न सक्छ?

एयरपोर्ट प्रकरण : तस्करीको छाँया

शर्मामाथि अर्को गम्भीर आरोप छ- त्रिभुवन अन्तर्राष्ट्रिय विमानस्थलको नेतृत्वमा रहँदा सुन तस्करी प्रकरणमा व्यापारी दीपक मल्होत्रालाई सहयोग गरेको। यो आरोप कहिल्यै औपचारिक रूपमा पुष्टि वा खारेज भएको छैन, तर प्रहरीभित्र र बाहिर दुबै क्षेत्रमा यो चर्चा लामो समयदेखि जीवित छ।

कार्की आयोग : ‘नियोजित’ भूमिका?

भदौ २३–२४ को ‘जेनजी’ प्रदर्शन छानबिनका लागि बनेको गौरीबहादुर कार्की नेतृत्वको आयोगमा सदस्य बनेका शर्मा त्यहाँ पनि विवादबाट टाढा रहन सकेनन्।

आयोगभित्र उनले अन्य सदस्यभन्दा बढी ‘चलखेल’ गरेको, विशेष गरी सुरक्षा निकायका उच्च अधिकृतहरूविरुद्ध पूर्वाग्रही ढंगले कारबाही सिफारिस गर्न भूमिका खेलेको आरोप छ।

एक उच्च प्रहरी अधिकृतको दाबी छ- ‘यो केवल अनुसन्धान थिएन, केही हदसम्म टार्गेटेड एजेन्डा जस्तो देखियो।’ यदि यस्तो हो भने, यो केवल व्यक्तिगत व्यवहार होइन-राजनीतिक उद्देश्यसहितको ‘पोजिसनिङ’ को संकेत हुनसक्छ।

नयाँ शक्ति केन्द्रतिर झुकाव

आयोगको प्रतिवेदन बुझाउनुअघि र त्यसपछि, शर्मा राष्ट्रिय स्वतन्त्र पार्टीका शीर्ष नेताहरूसँग सम्पर्कमा रहेको चर्चा पनि तीव्र छ। उनीहरूले आफूलाई ‘अख्तियारका लागि उपयुक्त उम्मेदवार’ भन्दै प्रस्तुत गरेको दाबी समेत स्रोतहरूले गर्छन्।

यही सन्दर्भमा अहिले चर्चाको केन्द्र बनेको छ- शर्मा रवि लामिछाने र बालेन शाहलाई ‘इम्प्रेस’ गर्दै अख्तियार प्रमुख बन्ने योजनामा छन्।

नैतिकताको प्रश्न

यदि यस्ता विवाद, आरोप र शंकाहरूबीच शर्मा अख्तियारको नेतृत्वमा पुग्छन् भने, त्यो केवल एक व्यक्तिको नियुक्ति हुँदैन- त्यो हुनेछ प्रणालीप्रतिको जनविश्वासमा सीधा प्रहार। विशेष गरी, भ्रष्टाचारविरुद्ध ‘क्लिन इमेज’ बनाएका रवि र बालेनजस्ता नेताहरूले यदि यस्तो पात्रलाई समर्थन गरे भने, प्रश्न उनीहरूको नैतिकता र प्रतिबद्धतामाथि पनि उठ्नेछ।

निष्कर्ष

विज्ञानराज शर्मा आज फेरि शक्तिको खेलमा छन्। तर, यो खेल केवल पदको होइन—विश्वसनीयताको हो। अख्तियारजस्तो संस्थाको नेतृत्वमा पुग्ने व्यक्ति केवल सक्षम होइन, निर्विवाद पनि हुनुपर्छ। शर्माको हकमा, अहिलेसम्म उठेका प्रश्नहरू नै उनको सबैभन्दा ठूलो बाधक बनेका छन्।