जिल्ला न्यायाधीशमा २० जनाको सिफारिस

काठमाडौं-  न्याय परिषद्ले जिल्ला न्यायाधीश पदका लागि आयोजित परीक्षामा उत्तीर्ण २० जना उम्मेदवारलाई नियुक्तिका लागि सिफारिस गरेको छ।

परिषद्को निर्णयअनुसार अधिवक्ता शिशिरकुमार यादव, सर्वोच्च अदालतका उपरजिस्ट्रार शिवप्रसाद आचार्य, जाजरकोट जिल्ला अदालतका श्रेस्तेदार ताराप्रसाद डाँगी, न्याय परिषद् सचिवालयका उपसचिव हीरालाल भुसाल, कोसी प्रदेशसभा सचिवालयका उपसचिव डिल्लीप्रसाद आचार्य, विशेष सरकारी वकिल कार्यालयका उपन्यायाधिवक्ता गोपालबहादुर भट्टराई तथा न्याय परिषद् सचिवालयका उपसचिव सुमन पाण्डे जिल्ला न्यायाधीशमा नियुक्तिका लागि सिफारिस भएका छन्।

यसैगरी सर्वोच्च अदालतका उपरजिस्ट्रार ठाकुरप्रसाद बस्ताकोटी, रुपन्देही जिल्ला अदालतका श्रेस्तेदार विकास बस्नेत, काभ्रेपलाञ्चोक जिल्ला अदालतका श्रेस्तेदार इन्दिरा कार्की, महान्यायाधिवक्ताको कार्यालयका उपन्यायाधिवक्ता बाबुराम भट्टराई, उच्च सरकारी वकिल कार्यालय पाटनका उपन्यायाधिवक्ता टेकराज भुसाल, सर्वोच्च अदालतका इजलास अधिकृत गोकुल पन्त, उच्च अदालत विराटनगर धनकुटा इजलासका रजिस्ट्रार वीरेन्द्रप्रकाश खड्का, उच्च अदालत सुर्खेत जुम्ला इजलासका रजिस्ट्रार महेन्द्रप्रसाद पौड्याल तथा सर्वोच्च अदालतका उपरजिस्ट्रार वासुदेव पाण्डे पनि सिफारिस सूचीमा परेका छन्।

त्यस्तै ऋण असुली पुनरावेदन न्यायाधिकरणका श्रेस्तेदार ललित सापकोटा, न्याय परिषद् सचिवालयका उपसचिव खेमकुमारी बस्नेत, सर्वोच्च अदालतका उपरजिस्ट्रार कर्णबहादुर राई तथा सर्वोच्च अदालतकै उपरजिस्ट्रार हीरामाया अवाललाई पनि जिल्ला न्यायाधीश नियुक्तिका लागि सिफारिस गरिएको परिषद्ले जनाएको छ।

न्याय परिषद्का अनुसार संवैधानिक व्यवस्था अनुसार परीक्षामा सफल उम्मेदवारहरूलाई जिल्ला न्यायाधीश पदमा नियुक्तिका लागि सिफारिस गरिएको हो।