जिउँदो भाइलाई ‘मरेको’ देखाएर ७२ लाखमा जग्गा बिक्री !

विराटनगर — विराटनगर–२ निवासी भरतबहादुर बस्नेतले आफ्नो जीवित भाइलाई मृत देखाउँदै सुनसरीको हाँसपोसा क्षेत्रको ३ कठ्ठा ८ धुर जग्गा बिक्री गरेको तथ्य फेला परेको छ।

जग्गाको हकमा ठगी गरिएको थाहा पाएपछि पूर्व प्रहरी निरीक्षकसमेत रहेका ७० वर्षीय केदारबहादुर बस्नेतले अनुसन्धान गर्दा आफैंलाई २०७५ सालमै कानुनी रूपमा मृत घोषित गरिएको प्रमाण फेला पारेका हुन्। “म त जिउँदो मान्छे, दाजुले मरेको भनेर जग्गा बेच्न खोज्नु भएको थाहा पाएपछि म चकित भएँ,” उनले गुनासो पोखे।

भरतबहादुरले यो कार्यमा वडाध्यक्ष कुमार पोखरेलसँग मिलेमतो गरेको प्रमाण भेटिएको छ। पोखरेलकै अध्यक्षतामा वडाबाट केदारको मृत्यु भएको झुटो सरजमिन मुचुल्का तयार गरी मालपोत कार्यालयमा सिफारिस पठाइएको थियो। त्यसैको आधारमा जग्गा नामसारी गरी पछि ७२ लाख रुपैयाँमा बिक्री गरिएको हो।

घटना सार्वजनिक भएपछि केदारबहादुरले जिल्ला अदालत मोरङमा १० जनाविरुद्ध मुद्दा दायर गरेका छन्। प्रतिवादीमा वडाध्यक्ष पोखरेल, तत्कालीन वडासचिव सूर्यबहादुर थापा लगायत छन्।

केदारबहादुरका अनुसार उक्त जग्गा उनका बुबाका जेठी श्रीमतीको नाममा रहेको र त्यसको रेखदेख भगिनी भगवतीले गर्दै आएकी थिइन्। तर भाइको मृत्यु देखाएर जग्गा कब्जा गर्ने नियतले दाजुले गैरकानुनी तरिकाले जग्गा बिक्री गरेको उनको आरोप छ।

वडाध्यक्ष पोखरेलले यस विषयमा प्रतिक्रिया दिन अस्वीकार गरेका छन्, उनले आफू कार्यक्रममा व्यस्त रहेको जनाएका छन्।