जडीबुटी उत्पादन कम्पनीमा आगजनी: २८ करोडको क्षति, उत्पादन प्रभावित

काठमाडौं– कोटेश्वरस्थित जडीबुटी उत्पादन तथा प्रशोधन कम्पनी लिमिटेडमा गत शुक्रबार राजावादी समर्थकको आगजनी र तोडफोडका कारण करिब २८ करोड रुपैयाँ बराबरको क्षति भएको छ ।

चैत १५ गते भएको घटनाले सञ्चो उत्पादन गर्ने भवन र ल्याब पूर्णरूपमा ध्वस्त भएको छ । कम्पनीका अनुसार प्रारम्भिक अनुमानमा २८ करोड रुपैयाँ बराबरको क्षति भएको छ, भने विस्तृत अध्ययन जारी छ ।

कम्पनीकी महाप्रबन्धक संगीता यादवका अनुसार आगजनीपछि केही दिन उत्पादन प्रभावित हुनसक्छ, तर अन्य शाखाहरूबाट सञ्चो उत्पादनलाई निरन्तरता दिने योजना बनाइएको छ ।

उनले आगजनीबाट कम्पनी नराम्रोसँग क्षतिग्रस्त भए पनि सरकारको सहयोगमा अझ बलियो रूपमा पुनः उभिने प्रतिबद्धता जनाइन् ।

२०३८ सालमा स्थापना भएको नेपाल सरकारको स्वामित्वमा रहेको कम्पनी निरन्तर शाखा विस्तार गर्दै आइरहेको थियो । यादवका अनुसार आगजनीका कारण शाखा विस्तारको काम केही समयलाई रोकिएको छ, तर कम्पनीले सञ्चो मह र सञ्चो टिमुर ल्याउने योजना यथावत् राखेको छ ।