रास्वपाको चियापान कार्यक्रममा प्रधानमन्त्रीदेखि शीर्ष नेताहरु सहभागी
कागजपत्र |
काठमाडौं – राष्ट्रिय स्वतन्त्र पार्टीले आफ्नो स्थापना दिवसको अवसरमा आयोजना गरेको चियापान कार्यक्रममा प्रधानमन्त्रीदेखि विभिन्न पार्टीका नेताहरु सहभागी भएका छन् ।
पार्टी केन्द्रिय कार्यालय बनस्थलीमा आयोजित चियापान कार्यक्रममा प्रधानमन्त्री तथा नेकपा माओवादीका अध्यक्ष पुष्पकमल दाहाल प्रचण्ड, सभामुख देवराज घिमिरे, नेपाली कांग्रेसका सभापति शेरबहादुर देउवा, नेपाल समाजवादी पार्टीका अध्यक्ष डा। बाबुराम भट्टराई, नेकपा एकीकृत समाजवादीका अध्यक्ष माधवकुमार नेपाल, जनमत पार्टीका अध्यक्ष सिके राउतलगायत सहभागी भएका छन् ।
त्यस्तै, एकीकृत समाजवादीका सम्मानित नेता झलनाथ खनाल, लोकतान्त्रिक समाजवादी पार्टीका अध्यक्ष महन्त ठाकुर, राष्ट्रिय सभाका अध्यक्ष नारायण प्रसाद दाहाल, उपसभामुख इन्दिरा राना मगरदेखि विभिन्न पार्टीका अन्य नेताहरु सहभागी थिए ।
चियापानमा सबैभन्दा पछि पुगेका थिए नेकपा एमालेका अध्यक्ष केपी शर्मा ओली । चियापानकै अवसरमा रास्वपाले नेपाली उत्पादनका विभिन्न स्टलहरु राखेको थियो । ती स्टलहरूको पूर्वप्रधानमन्त्री समेत रहेका ओलीले चासोपूर्वक अवलोकन गरेका छन् । त्यसक्रममा अध्यक्ष ओलीलाई भाङ्ग्रो, अल्लो लगायतबाट बनाइएका कपडा उपहार दिइएको छ । त्यस्तै नेपाली उत्पादन च्याउ समेत ओलीलाई उपहार दिइएको थियो ।
