रअ प्रमुख गोयलले काठमाडौं छाडे– बालुवाटारमा राजनीतिक चाप
कागजपत्र |
काठमाडौं– भारतीय गुप्तचर संस्था रिसर्च एण्ड एनालाइसिस विङ (रअ) का प्रमुख सामन्त गोयल नयाँ दिल्ली फर्किएका छन् । उनले प्रधानमन्त्री निवास बालुवाटारमा राजनीतिक चाप छाडेर स्वदेश फर्किएका हुन् ।
बुधबार दिउँसो काठमाडौं उत्रिएका उनी आउनुको कुटनीतिक कारणबारे सरकार नाजवाफ छ । गोयलले उच्च तहका राजनीतिक भेट गरेको भन्ने विषयमा सरकारले जवाफदेहिता प्रस्तुत गरेको छैन ।
नेपाल कम्युनिस्ट पार्टीका अध्यक्ष पुष्पकमल दाहाल प्रचण्डको सचिवालयले गोयलसँग भेट नभएको दाबी गरेका विवरण सतहमा आएका छन् ।
भारतीय गुप्तचर प्रमुख गोयलको टोली विहीबार बिहान त्रिभुवन अन्तर्राष्ट्रिय विमानस्थलमा देखा परेको थियो । त्रिभुवन अन्तर्राष्ट्रिय विमानस्थल सुरक्षा स्रोतका अनुसार आईएफबी ६०४५ कल साइनको चार्टर्ड उडानबाट उनीहरु स्वदेश फर्किएका हुन् ।
गोयल नेपाल आउनुको प्रमुख उद्देश्य नेपालको राजनीतिक परिवेशलाई फरक दिशामा घुमाउने प्रयत्नका रुपमा व्याख्या गरिएका टिप्पणीहरू सुनिन थालेका छन् ।
