सिन्धुपाल्चोक काँग्रेस अधिवेशन आजबाट सुरु, नेतृत्वको लागि ३ जना भिड्दै

चौतारा – नेपाली काँग्रेस सिन्धुपाल्चोकको अधिवेशन आजबाट सुरु भएको छ । नेपाली काँग्रेसको १४ औं महाधिवेशन अन्तर्गत आजबाट जिल्ला अधिवेशन सुरु भएको हो ।

विभिन्न कारणले पटक–पटक तय भएर पनि हुन नसकेको अधिवेशन आजबाट सिन्धुपाल्चोकको चौतारामा हुँदैछ । अधिवेशन अन्तर्गत भोलि फागुन २८ गते नयाँ नेतृत्व चयनका लागि मतदानको कार्यक्रम हुने नेपाली काँग्रेस सिन्धुपाल्चोकका सभापति विकास लामाले जानकारी दिए ।

अधिवेशन अन्तर्गतको निर्वाचनका लागि कार्यक्रम तालिका र मतदाता नामावली सार्वजनिक भइसकेको निर्वाचन अधिकृत देव बहादुर महतले बताए ।

जिल्ला सदरमुकाम चौतारास्थित काँग्रेस पार्टी कार्यालयमा शुक्रवार मनोनयन दर्ताका कार्यक्रम रहेको छ । शुक्रबार दिउँसोबाट मनोनयन दर्ता सुरु हुने निर्वाचन अधिकृत महतले बताए ।

नेतृत्व हत्याउने दाउमा वंशलाल तामाङ, डा। प्रेमध्वज लामा र जंगबहादुर लामा निर्वाचनमा होमीएका छन् । तामाङ संस्थापन इतर पक्षका हुन् भने अन्य दुई उम्मेदवार प्रेमध्वज लामा र जंगबहादुर लामा संस्थापन पक्षका मानिन्छन् ।