क्यानडाको राजधानीमा जारी ट्रक ड्राइभरको प्रदर्शन प्रधानमन्त्री ट्रुडोलाई अस्वीकार्य
कागजपत्र |
एजेन्सी – क्यानडाका प्रधानमन्त्री जस्टिन ट्रुडोले देशभरिका ट्रक चालकले गरेको आन्दोलनप्रति आक्रोश व्यक्त गर्दै त्यसलाई अस्वीकार्य भनेका छन्। त्यहाँको प्रहरीले समेत दुई सातादेखि राजधानी सहर ठप्प पारेका लरी चालकहरूलाई आपराधिक अभियोगमा पक्रन सक्ने चेतावनी दिएको छ।
ओटावाका सडक अवरोध पार्नेजस्ता कामलाई आपराधिक कार्य मान्न सकिने भन्दै प्रहरीले त्यस्तो काम बन्द गर्न वा अभियोग सामना गर्न तयार रहन सजग गराएको छ। लरी चालकहरूले अनिवार्य रूपमा खोप लगाउनु पर्ने वा परीक्षण गर्नुपर्ने विषयलाई लिएर सुरु भएको प्रदर्शन अहिले निकै व्यापक भएको छ।
ओटावास्थित संसद्मा बुधवार बोलेका ट्रुडोले कोभिड नियमहरूको बचाउ गरेका छन्। ‘अवरोध, गैरकानुनी प्रदर्शनहरू अस्वीकार्य छन् र तिनले व्यावसाय र उत्पादनमा नकारात्मक असर पारेका छन्,’ उनले भने। ‘यसलाई अन्त्य गर्न हामीले सबथोक गर्नुपर्छ।’
उनले प्रदर्शनकारीहरूले देशको ‘अर्थतन्त्र र प्रजातन्त्रलाई अवरोध पार्ने प्रयास गरेको’ बताए। कोभिड लागेका कारण एक साता एकान्तमा बसेर उनी सोमबारबाट संसद् फर्किएका हुन्।
सोमवारबाट प्रदर्शनकारीहरूले अमेरिकासँग जोडिने एउटा मुख्य पुलमा समेत अवरोध पुर्याएका छन्। अमेरिकासँग जोडिने मुख्य मार्गमा समेत अवरोध खडा पारिएपछि ह्वाइटहाउसकी प्रेस सेक्रेटरी जेन साकीले प्रदर्शन अन्त्यको आह्वान गरेकी छन्। उनले क्यानाडाको अमेरिकासँगको सबैभन्दा व्यस्त हुने बाटोमा रहेको एउटा पुल ‘एम्ब्यासडर ब्रीज’ बारे बोलेकी थिइन्।
अमेरिकासँग जोडिने मुख्य मार्गमा समेत अवरोध खडा पारिएको छ । उनले भनिन्, ‘त्यसले द्विपक्षीय व्यापारको २५ प्रतिशत ओघट्छ। र त्यहाँको अवरोधले खासगरी अटोमोबाइल क्षेत्रसहितको आपूर्ति चक्रमा असर पुर्याएको छ।’ क्यानडामा राज्यहरूले कोभिड प्रतिबन्धलाई खुकुलो पार्न थाले पनि ट्रुडो सङ्घीय नियमका विषयमा दृढ छन्।
