टी-२० विश्व कपकाे छनाेट खेल्न नेपाली टाेली ओमान प्रस्थान
कागजपत्र |
काठमाडाैं – टी–२० विश्व कप क्रिकेटको ग्लोबल छनोट खेल्न नेपाली राष्ट्रिय क्रिकेट टोली ओमान प्रस्थान गरेको छ । टोली केहीबेरअघि ओमान प्रस्थान गरेको हो ।
दिउँसो युवा तथा खेलकुद मन्त्री महेश्वरजंग गहतराजले टी–२० विश्व कप क्रिकेटको ग्लोबल छनोट खेल्न ओमान जान लागेको नेपाली राष्ट्रिय क्रिकेट टोलीको बिदाइ गरे । कोरोना महामारीका कारण भर्चुअल माध्यमबाट मन्त्री गहतराजले बिदाइ गरेका हुन् ।
नेपाली टोली आज राति साढे आठ बजे ओमान प्रस्थान गर्ने तालिका छ । मन्त्री गहतराजले विश्व कपमा छनोट भएर आउन शुभकामना दिँदै नेपाली क्रिकेट क्षेत्रले छोटो समयमै गरेको उल्लेख्य प्रगति हेर्दा सफल हुनेमा विश्वस्त रहेको पनि बताए ।
सरकारले खेल पूर्वाधार निर्माणका लागि उल्लेख्य प्रयास गर्दै आएको भन्दै मन्त्री गहतराजले केही ठूला पूर्वाधारहरू निर्माणाधीन अवस्थामा रहेकाले आफ्नै कार्यकालमा त्यसलाई पूर्णता दिने गरी काम भइरहेका दाबी गरे ।
कार्यक्रममा नेपाल क्रिकेट सङ्घ क्यानका अध्यक्ष चतुरबहादुर चन्दले विगतका कमजोरी सच्याएर नेपालले उत्कृष्ट खेल्ने विश्वास व्यक्त गरे । छनाेट खेल फेब्रुअरी १८ तारिखदेखि हुँदैछ । ग्लोबल छनोटको समूह ‘ए’ मा नेपाल, क्यानाडा, फिलिपिन्स र ओमान रहेका छन् ।
