गठबन्धनमा एमसिसीबारे कुनै विवाद छैन, पारित गर्न सबै पोजेटिभ छौँ : नेता पौडेल
कागजपत्र |
काठमाडौं – नेपाली काँग्रेसका वरिष्ठ नेता रामचन्द्र पौडेलले एमसिसी पारित गर्ने विषयमा गठबन्धनका सबै दल ‘पोजेटिभ’ रहेको बताएका छन् ।
गठबन्धनका शीर्ष नेताबीच एमसिसी पारित गर्ने सहमति भएको सन्दर्भमा नेता पौडेलले राष्ट्रिय महत्त्वका विषयमा गठबन्धनले साझा धारणा बनाउँदै जाने बताएका हुन् । एमसिसीबारे सार्वजनिक भएका चासोहरुलाई सम्बोधन गर्ने गरी संसदबाट अनुमोदन गराइने पौडेलले बताए ।
गठबन्धनमा एमसिसीबारे कुनै विवाद नरहेको बताउँदै नेता पौडेलले बुझाइ फरक भए पनि बिस्तारै ‘साझा धारणा’ बन्दै गएको बताए । नेकपा माओवादी र नेकपा एकीकृत समाजवादीले एमसिसीबारे प्रस्ट कुरा गर्नुपर्ने भन्दै नेता पौडेलले अब संसदले निकास खोज्नुपर्ने बताए ।
‘निकास त देशलाई दिनुपर्यो । गठबन्धन अब निरीह बसिरहन सक्दैन । सबै विषयमा गठबन्धन क्लियर कट हुनुपर्छ’, पौडेलले भने । उनले मुलुक सधैँ ऋणमा नचल्ने भन्दै अनुदानमा प्राप्त सहयोग लिनु अन्यथा नहुने बताए ।
अमेरिका मात्रै नभइ विश्वका जुनसुकै राष्ट्रले नेपालको विकासका लागि र नेपालको अर्थतन्त्रलाई सुधार गर्नको लागि दिने अनुदान लिनुपर्ने धारणा व्यत्त गरे ।
त्यस्तै, आज मात्रै प्रधानमन्त्री शेरबहादुर देउवा र नेकपा माओवादी केन्द्रका अध्यक्ष पुष्पकमल दाहाल प्रचण्डबीच भएको छलफलमा एमसीसीको विषयमा गठबन्धनमा विवाद नभएको र यसले गठबन्धन तलमाथि नहुने नेताहरूले बताएका छन् ।
त्यसैगरी आजै जनता समाजवादी पार्टीका संघीय परिषद्का अध्यक्ष डा. बाबुराम भट्टराईले अमेरीकी सहयोग एमसीसी सर्वसम्मतिले संसदबाट पारित गर्न आग्रह गरेका छन्।
त्यससैगरी माओवादी केन्द्रका नेता नारायणकाजी श्रेष्ठले अमेरीकाले दिने सहयोग एमसीसी संशोधनपछि मात्रै पारित गर्नुपर्ने धारणा सार्वजनिक रूपमा राखेका छन् ।
