इजरायलमा १५ सय बढी रकेट प्रहार,९० प्रतिशत रकेट गरियाे आकाशमै ध्वस्त

जेरुसेलम – इजरायल र प्यालेस्टिनी लडाकुबीच हिंसा चर्किएपछि हमास र अन्य लडाकु समूहले इजरेली भूमितर्फ १५ सय वटाभन्दा बढी रकेट प्रहार गरेको इजरायली सेनाले बताएको छ। तर तीमध्ये अधिकांश रकेटलाई इजरायलको ‘आइरन डोम’ नामक प्रतिरक्षा प्रणालीले निस्तेज पारिदिएको छ ।

इजरायली अधिकारीहरूका अनुसार उक्त प्रणालीले ९० प्रतिशत सफलतासहित प्रहार गरिएका रकेटलाई आकाशमै ध्वस्त परेका छ । जसका कारण बस्ती भएका इजरायली सहरलाई जोगाउन सकेको उनीहरुको भनाइ छ ।

आइरन डोम प्रणालीले कसरी काम गर्छ ?

‘आइरन डोम’मा इजरेलभरि प्रयोग गरिएको विविध क्षेप्यास्त्र प्रतिरक्षा प्रणालीहरू संलग्न छन्। त्यसका लागि इजरायलले अर्बौँ डलर खर्च गरेको छ ।

इजरायलतिर प्रहार गरिएका रकेटहरूको अवस्थिति पत्ता लगाउन उक्त प्रणालीले रेडार प्रयोग गर्छ अनि तिनलाई निस्तेज पार्न दुईवटा अवरोधक क्षेप्यास्त्र प्रहार गर्छ।

यो प्रविधिले मानिसको बसोबास भएको क्षेत्रमा पुग्न सक्ने र लक्ष्यभेदन नगर्ने क्षेप्यास्त्र छुट्याउन सक्छ। सहरतिर लक्ष्य गरेर प्रहार भएका क्षेप्यास्त्रलाई निसाना बनाएर तल झारिन्छ।

टाइम्स अफ इजरेल पत्रिकाका अनुसार एउटा अवरोधक क्षेप्यास्त्रको मूल्य डेढ लाख अमेरिकी डलर पर्छ। एजेन्सी