इरानमा पक्राउ परेका नेपाली अमृत झा सकुशल

काठमाडौं-  इरानमा नियन्त्रणमा रहेका नेपाली नागरिक अमृत झा सकुशल रहेको परराष्ट्र मन्त्रालयले जनाएको छ। मन्त्रालयका अनुसार ३३ वर्षीय झा हाल इरानको कारागारमा रहेका छन्।

परराष्ट्र मन्त्रालयका प्रवक्ता लोकबहादुर क्षेत्रीका अनुसार झा वर्तमान मध्यपूर्व तनाव सुरु हुनुअघि नै पक्राउ परेका हुन्। त्यसैले उनको मुद्दा हालको द्वन्द्वसँग सम्बन्धित नभएको स्पष्ट गरिएको छ।

महोत्तरीका झा उदयपुरको त्रियुगा नगरपालिका–११ मा बस्दै आएका थिए। उनी करिब दुई वर्षअघि रोजगारीका लागि दुबई पुगेका थिए। त्यहाँबाट जहाजमार्फत तेल लिन इरान जाने क्रममा उनी पक्राउ परेका खुलेको छ।

मन्त्रालयले झाको अवस्थाबारे थप विवरण संकलन गरिरहेको र आवश्यक कूटनीतिक पहल जारी रहेको जनाएको छ।