१ वर्षमा १५ अर्ब रूपैयाँबराबरको गेडागुडी आयात

काठमाडौँ – आर्थिक वर्ष ०८०/८१ मा १५ अर्ब १ करोड ९६ लाख रूपैयाँबराबरको गेडागुडी तथा दलहन आयात भएको छ । मुलुकले एक वर्षमा १४ करोड ७७ लाख ५९ हजार किलो गेडागुडी आयात गरेको भन्सार विभागले जनाएको छ ।

केराउ, चना, बोडी, सानो रातो बोडी, राजमा, तनेबोडी, बकुला, सिमीलगायत गेडागुडी आयात भएको विभागले जनाएको छ । विभागका अनुसार गत आर्थिक वर्ष ५ अर्ब १० करोड ५० लाख रूपैयाँबराबरको रातो दाल र १ करोड ५० लाख १३ हजार रुपैयाँ बराबरको केराउ आयात गरिएको थियो ।

मुलुकमा ४ अर्ब ५ करोड रूपैयाँबराबरको चना, ३ अर्ब ४१ करोड ६८ लाख रुपैयाँको बोडी, ४७ करोड ९७ लाख रुपैयाँको राजमा आयात भएको विभागको तथ्यांक छ । ८ करोड ६२ लाख रुपैयाँको अन्य बोडी र १ करोड ४ लाख रुपैयाँको तनेबोडी आयात भएको छ ।

नेपालमा सबैभन्दा बढी अस्ट्रेलियाबाट ३ अर्ब ५१ करोड ३० लाख रुपैयाँको चना आयात भएको छ । म्यानमारबाट १ अर्ब ६४ करोड ३ लाख रुपैयाँको बोडी, भारतबाट ४० करोड ९२ लाख रुपैयाँको राजमा आयात गरिएको विभागले जनाएको छ । भारतबाट १ करोड ५० लाख रुपैयाँ बराबरको केराउ आयात गरिएको छ ।

नेपालमा भारत, चीन, म्यानमार, अस्ट्रेलिया, क्यानडा, केन्या, अर्जेन्टिना, ब्राजिल, साउथ अफ्रिका, भेनुजुयला, मोरोक्को, इन्डानेसियालगायत विभिन्न मुलुकबाट गेडागुडी आयात हुने गरेको छ । आर्थिक वर्ष ०७९र८० मा १४ अर्ब ८ करोड ३८ लाख रूपैयाँबराबरको गेडागुडी तथा दलहन आयात भएको थियो । विभागका अनुसार १४ करोड ५२ लाख ६६ हजार किलो आयात भएको थियो ।