गगन थापालाई डेंगी, कांग्रेसका दुवै महामन्त्री ओछ्यानमा…
कागजपत्र |
काठमाडौं – नेपाली कांग्रेसका महामन्त्री एवं गगनकुमार थापालाई डेंगी पुष्टी भएको छ ।
गगन बिरामी भएसँगै आगामी प्रदेश प्रतिनिधिसभका निर्वाचनका लागि उम्मेदवार चयनको मारामारी चलिरहेका बेला नेपाली कांग्रेसका महामन्त्रीद्वय गगनकुमार थापा र विश्वप्रकाश शर्मा विरामी परेका हुन् ।
कांग्रेसका महामन्त्री थापालाई डेंगी संक्रमण भएको छ । उनी एक्कासी बिरामी भएपछि परीक्षण गर्ने क्रममा डेंगी संक्रमण पाइएको हो ।
उनलाई १०४ डिग्री ज्वरो आएको थियो । पछिल्लो समय नेता तथा कार्यकर्ताको भेटमा निकै व्यस्त रहेका थापा बढी नै धपेडीमा थिए । जिल्ला जिल्लाबाट आएका उम्मेदवारका आकांक्षीहरु उनको घरमै लाइन लागेर उनीसँग आफ्ना विचार राख्दै आएका थिए ।
तर अचानक शरीर दुख्ने र ज्वरो आउने भएसँगै उनको स्वास्थ्य परीक्षण गर्दा डेंगी देखिएको हो । अब केही दिन उनी आराम गर्नेछन् भने कुनै भेटघाट नहुने उनको सचिवालयले जनाएको छ ।
चिकित्सकको सल्लाहअनुसार औषधि लिँदै उनी निवासमै आराम गरिरहेका छन् ।
त्यस्तै, महामन्त्री शर्मा मृगौलामा पत्थरी भएका कारण त्यसको अप्रेसन गरी दुई दिन अघिमात्र घर फर्किएका छन् ।
