तानसेन–बुटवल खण्डमा सुक्खा पहिराे, सडक अवरुद्व

काठमाडाैं – सडकमा खसेकाे सुक्खा पहिरोका कारण तानसेन बुटवल सडक खण्ड अवरुद्व भएको छ । सिद्धार्थ राजमार्ग अन्तर्गत पर्ने पाल्पाको तिनाउ गाउँपालिका ५ कालीमाटीमा आज साेमवार दिउँसो पहिरो खसेपछि सडक बन्द भएको हो।

अहिले डोजर लगाएर पहिरो पन्छाउने काम भइरहेको छ । सुक्खा पहिरो गएको भए पनि अहिले पानी पर्न थालेकाले पहिरो पन्छाउन समस्या भएको जिल्ला प्रहरी कार्यालय पाल्पाले जनाएको छ ।

दुईतर्फी रूपमा नै सडक बन्द भएकाले पाल्पाबाट वुटवलतर्फ जाने तथा बुटवलदेखि पाल्पातर्फ आउने यातायातका साधन बाटोमै रोकिएका छन् ।

सडक माथिबाट लगातार पहिरो खसिरहेकाले पहिरो पन्छाउन दुई/तीन घण्टाभन्दा धेरै समय लाग्न सक्ने प्रहरीले जनाएको छ । त्यही ठाउँमा केही दिनअघि पनि सुक्खा पहिरो खसेको थियो ।