भक्तपुरको बोडेमा आज जिब्रो छेड्ने जात्रा हुँदै

काठमाडौं – भक्तपुरको प्रसिद्ध बिस्का: जात्राका क्रममा आज बोडेमा जिब्रो छेड्ने जात्रा हुँदैछ । हरेक वर्ष वैशाख २ गते मध्यपुरको बोडेमा जिब्रो छेड्ने जात्रा मनाउने परम्परा छ ।

यस वर्ष पनि बोडेका ४९ वर्षीय बुद्धकृष्ण वाग श्रेष्ठले नै जिब्रो छेड्ने भएका छन् । यो वर्ष उनले नवौं पटक जिब्रो छेडाउन लागेका हुन् ।

जिब्रो छेड्ने व्यक्तिले तीन दिन अघिदेखि केही नखाई व्रत बस्ने गर्दछन् भने व्रत सुरू भएदेखि जिब्रो नछेडेसम्म सुत्नसमेत नहुने मान्यता रहेको छ । जिब्रो छेड्दा पीडा नहोस् भनेर सात दिनदेखि नून समेत नखाने चलन छ ।

जिब्रो छेड्नुअघि शक्ति प्राप्त होस् भनेर बोडे क्षेत्रका विभिन्न देवीदेवताको पूजाआजा गर्ने गरिन्छ । पाँचो गणेशको पाटीमा पुगेपछि जात्राका नकर्मी नाइकेले जिब्रो छेडिदिने गर्दछन् । एक महिना अघिदेखि तेलमा डुबाएर राखेको फलामको १० इञ्च लामो सुइरो जिब्रोमा छेडेने गरिन्छ । त्यसपछि जिब्रो छेड्ने व्यक्तिले महादीप बोकेर एक घण्टा नगर परिक्रमा गरेर बोडेको महालक्ष्मी मन्दिरमा पुगेर सुइरो झिकेपछि जात्राको समापन हुने गर्दछ ।